काठमाडौं । नेकपा (माओवादी केन्द्र) का प्रभावशाली नेता तथा राष्ट्रियसभा सदस्य रामनारायण बिडारीले अहिलेको स्थानीय तहको निर्वाचनको परिणाम सन्तोषजनक रहेको स्पष्ट पारेका छन् ।

उनले एमालेलाई प्रतिगामी शक्तिको रूपमा चित्रण गरे । अहिलेको निर्वाचनको सानो झापड खाएपछि एमाले थचक्कै भएको बिडारीको टिप्पणी छ ।

जनता जान्न चाहन्छन् कार्यक्रममा पत्रकार ऋषि धमलासँग कुरा गर्दै उनले एमालेले पनि ९ दलीय गठबन्धन गरेको जिकिर गरे । उनले केपी ओलीले यस पटकको निर्वाचनमा राप्रपासँग तालमेल गरेको सुनाए ।

उनले काठमाडौं महानगरको मेयरमा बालेन शाहले पाएको मत ‘नो भोट’ भएको उल्लेख गरे । उनले अहिले प्रचण्डको विकल्प देशलाई त नभएको जिकिर गरे । उनले यो देशको राजनीति प्रचण्डबिना अघि बढ्न नसक्ने पनि ठोकुवा गरे ।

उनले भने,‘प्रचण्डबेगर यो देशको राजनीति अघि बढ्न सक्दैन । प्रचण्डले यो देशलाई के गर्नुभएन ? सङ्घीयता, धर्मनिरपेक्षता कसले ल्यायो ?’ उनले यो मुलुकको राजनीतिलाई अघि बढाउने व्यक्ति भनेको प्रचण्ड नै भएको जिकिर गरे । उनले अहिले माओवादी केन्द्रको जनमत बढेको स्पष्ट पारे । उनले अबको सङ्घीय निर्वाचनमा आफ्नो पार्टी दोस्रो हुने पनि दाबी गरे ।

उनले अहिलेको स्थानीय तहको निर्वाचनमा उम्मेदवार नै कम उठाएकोले माओवादी तेस्रो भएको भए पनि अबको निर्वाचनमा माओवादी दोस्रो हुने ठोकुवा गरे ।

उनले केपी ओलीले आफूले प्रतिनिधिसभा विघटन गरेर गम्भीर गल्ती गरेको भनेर स्विकारे आफूहरू वार्ता गर्न तयार रहेको सुनाए ।

उनले अहिलेको गठबन्धन कुनै पनि हालतमा नभत्किने जिकिर गरे । उनले अहिलेको गठबन्धन नभएको भए अहिले स्थानीय तहको निर्वाचन नै हुने थिएन भन्ने पनि आशङ्का गरे ।

भिडिओ !