काठमाडौँ । साताको पहिलो कारोबार दिन आज सेयर बजार उच्च अंकले बढेको छ । आज पुँजीबजार मापक परिसूचक ’नेप्से’ ७१ दशमलव २० अंकले बढेर २ हजार ५ सय ९१ दशमलव ४२ विन्दुमा उक्लिएको छ ।

गत साताको अन्तिम कारोबार दिन बिहीबार नेप्से १२ दशमलव ५३ अंकले बढेर २ हजार ५ सय २० दशमलव २३ अंकमा पुगेको थियो ।

नेपाल स्टक एक्सचेञ्ज (नेप्से)का अनुसार आज कारोबार रकम पनि बढेको छ । साताको पहिलो कारोबार दिन आज ५ अर्ब १७ करोड ३२ लाख रुपैयाँभन्दा बढीको सेयर कारोबार भएको छ । आज कूल २३१ वटा कम्पनीका ८६ लाख एक हजार ९६५ कित्ता सेयर किनबेच भएका छन् ।

यसैगरी ठूला कम्पनीहरुको सेयर कारोबार मापन गर्ने सेन्सेटिभ परिसूचक पनि आज ५ दशमलव ३८ अंकले बढेर ४ सय ८२ दशमलव ७४ विन्दुमा उक्लिएको छ । आज १५ कम्पनीको कारोबारमा सकारात्मक सर्किट लागेको छ ।

यस्तै १४ कम्पनीको सेयर मूल्य सकारात्मक सर्किट लेबलमा कारोबार भएको नेप्सेले जानकारी दिएको छ । आज कारोबारमा आएका १३ मध्ये दुई उपसमूहको सेयर मूल्य घटेको छ भने बाँकी उपसमूहको सेयर मूल्य बढेको छ । आज जलविद्युत् र फाइनान्स उपसमूहका कम्पनीहरुको सेयर मूल्य घटेको छ ।