काठमाडौं – सत्ता परिवर्तन र प्रतिनिधिसभा पुनःस्थापनासँगै जनता समाजवादी पार्टी (जसपा)का सांसदहरुले कित्ता परिवर्तन गर्न थालेका छन् । निर्वाचन आयोगमा आधिकारिकता विवाद चलिरहेका बेला जसपाको महन्थ ठाकुर पक्षका ५ जना सांसद उपेन्द्र यादवतिर खुलेका छन् ।

ठाकुर पक्षका चार महिलासहित पाँचजना सांसद आज उपेन्द्र यादव पक्षको बैठकमा सहभागी भएका छन् । ठाकुर पक्षका पाँच सांसद अहिले आफ्नो समूहको बैठकमा सहभागी भएको जसपा नेता मोहमद इस्तियाक राईले जानकारी दिनुभएको छ ।

पार्टीको आधिकारिकता विवाद निर्वाचन आयोगमा चलिरहेका बेला जसपाका दुवै पक्ष विभाजनको लागि तयार भइसकेका छन् ।

यसअघि ठाकुर पक्षमा रहेका प्रमोद साह, अमृता अग्रहरि, रानी मण्डल, नरमाया ढकाल र रुही नाज आज यादव पक्षको संसदीय दलको बैठकमा सहभागी भएका हुन् । जसपाका ३२ जना सांसदमध्ये यसअघि ठाकुर पक्षमा २० जना थिए । पाँच जनाले यादव समूहलाई साथ दिएपछि अब संसदीय दलमा पनि यादव पक्ष १२ बाट १७ पुगेको छ । यो बहुमत संख्या हो ।

अध्यक्ष ठाकुरले लोकतन्त्रको हत्या गर्न खोजेकाले आफूहरु यादव पक्षमा लागेको सांसद साहले बताउनुभयो । तर, ठाकुर पक्षले भने केही पदलोलुपले कित्ता परिवर्तन गरेको र त्यसले पार्टीलाई कुनै असर नपर्ने जनाएको छ ।