काठमाडौं – आफैंले सहयोग गरेर राजनीतिमा ल्याएको दीपक मनाङ्गे (राजीव गुरुङ)ले आफूलाई धोका दिएको गण्डकीका निवर्तमान मुख्यमन्त्री पृथ्वीसुब्बा गुरुङले बताएका छन् ।

आज आफ्नै निवासमा पत्रकारसँग कुरा गर्दै गण्डकीका एमाले संसदीय दलका नेतासमेत रहेका गुरुङ मनाङेले आफूलाई ‘धोका’ दिएको बताएका हुन् ।

मनाङ्गेलाई आफूले चुनाव जिताएको, प्रदेशसभा सदस्यको सपथ दिलाउन भूमिका खेलेको दाबी गर्दै गुरुङले भन्नुभयो, ‘सबै छोड्छु, राजनीति र समाजसेवा गर्छु, सुध्रिन्छु भनेपछि मैले नै सघाएको हो । तर, सबै डाकुहरु वाल्मिकी नहुँदा रहेछन् ।’

मनाङ्गेलाई यसअघि ग्ुन्डा नाइके भनेर चिनिने गरिएको थियो । उनीमाथि सार्वजनिक अपराधका विभिन्न मुद्दा लोका थिए । यसैबीच, उनी राजनीतिमा लाग्दै मन्त्रीसमेत भइसकेका छन् ।

निवर्तमान मुख्यमन्त्री गुरुङले नै मनाङ्गेलाई १६ वैशाखमा युवा तथा खेलकुदमन्त्री पनि बनाएका थिए । आफूलाई योभन्दा ठूलो धोका अरु नहुने उनको भनाइ छ ।

मनाङ्गे कित्ता परिवर्तन गर्दै नेपाली कांग्रेस, नेकपा (माओवादी केन्द्र)सहितको विपक्षी गठबन्धनतिर लागेपछि वैकल्पिक सरकार बनेको छ ।
कांग्रेसका कृष्णचन्द्र नेपाली (पोखरेल) नयाँ मुख्यमन्त्री बनेका छन् ।