काठमाडौं – विपक्षी गठबन्धन संसद् विघटनविरुद्ध सोमबार मात्रै सर्वोच्च अदालत जाने भएको छ । सांसदहरुको हस्ताक्षर संकलन कार्य जारी रहेकाले संसद् पुनःस्थापनाको मागसहित रिट हाल्न सर्वोच्च जाने निर्णय एकदिनलाई पछि सारिएको स्रोतले जनाएको छ ।
केही सांसद उपत्यका बाहिर भएकाले र कोही बिरामी पनि रहेकोले आजको कार्यक्रम स्थगित भएको बताइएको छ ।

नेकपा (एमाले)का तर्फबाट हालसम्म २० जना सांसदले रिटका लागि हस्ताक्षर गरिसकेको स्रोतको दाबी छ ।

यसैबीच, संसद् विघटनविरुद्धको रिटका लागि प्रमुख प्रतिपक्षी नेपाली कांग्रेस, नेकपा (माओवादी केन्द्र)ले पनि आफ्ना सांसदहरुको हस्ताक्षर संकलन गरेको छ ।

नेपाल समूहसँगै यी दलका सबै सांसदको हस्ताक्षरसहित नेताहरु सोमबार बिहान १० बजे अदालत जाने बताइएको छ ।
गत शुक्रबार प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीले संसद् विघटन गरेर निर्वाचनमा जाने घोषणा गर्नुभएको थियो ।
प्रमुख प्रतिपक्षी दलहरु लगायत एमालेकै नेपाल समूहले यस कदमलाई असंवैधानिक भन्दै आएका छन् ।