काठमाडौँ – नेपाल कम्युनिष्ट पार्टी नेकपाका अध्यक्ष पुष्पकमल दाहाल प्रचण्डले आफूलाई प्रधानमन्त्री केपी शर्मा ओलीले महाधिवेशनपछि एकल अध्यक्ष र प्रधानमन्त्री बन्न प्रस्ताव गरेको खुलासा गर्नुभएको छ ।

आफूपक्षीय अथार्त पूर्व माओवादी खेमाका नेताहरुसँगको सोमबारको छलफलमा प्रचण्डले त्यसका लागि जनताको बहुदलीय जनवाद मान्न ओलीले आग्रह गरेको तर आफूले इन्कार गरेको बताउनुभएको हो ।

प्रचण्डले पूर्व माओवादीका सबै स्थायी कमिटि सदस्यहरुलाई आज बिहान खुमलटारस्थित निवासमै बोलाएर यसबारे बिप्रिङ गर्नुभएको थियो । सो क्रममा पार्टीको विवादबारे अब कसरी अघि बढ्ने भन्नेबारे सुझाव समेत संकलन गरिएको थियो ।

बैठकमा प्रचण्डले पार्टीको सिद्धान्त जनताको बहुदलीय जनवाद माने महाधिवेशनबाट एकल अध्यक्ष र त्यसले पनि नपुगे प्रधानमन्त्री समेत बताउने प्रस्ताव ओलीले राख्नुभएको जानकारी गराउनुभएको थियो । तर ओलीको उक्त प्रस्तावलाई इन्कार गरेको कुरा अध्यक्ष प्रचण्डले आफूहरुसँगको छलफलमा सुनाउनुभएको स्थायी कमिटि सदस्य लिलामणि पोखरेलले जानकारी दिनुभयो ।

नेतृत्व परिवर्तनकै कुरामा सहमति खोज्ने हो भने त्यो काम त केन्द्रीय समितिबाटै हुन सक्ने कुरामा ओली र दाहालबीच सवाल जवाफ भएको उहाँले जानकारी दिनुभयो ।