काठमाडौं । नेपाली काँग्रेसका केन्द्रीय सदस्य रमेश लेखकले संसद अधिवेशन अन्त्य गर्दा पनि सरकारले पद्धती र परम्पराको उलंघन गरेको टिप्पणी गर्नुभएको छ ।

प्रतिनिधि सभाको बैठकको तयारी भइरहेका अवस्थामा सभामुखलाई समेत जानकारी नदिई सरकारले अधिवेशन अन्त्य गर्नु सरकारको स्वेच्छाचारीता भएको उहाँको भनाई थियो ।

नेपाली रेडियो नेटवर्कको नेपाली बहसमा उहाँले भन्नुभयो, “सामान्यतयाः अधिवेशन अन्त्य गर्दा अधिवेशनको अन्तिम बैठक बोलाएर त्यसमा अधिवेशनभरी भएका कामहरुको जानकारी दिदै अधिवेशन अन्त्यका लागि राष्ट्रपतिले पठाएको पत्र बाचन गर्ने परम्परा र पद्धती हुन्छ ।”

तर अहिलेको सरकारले आजका लागि बोलाइएको बैठकलाई समेत वेवास्ता गरी हतार हतारमा हिजो नै अधिवेशन अन्त्य गर्नु संसदीय मान्यता र मर्ममाथीको ठाडो प्रहार भएको उहाँले आरोप लगाउनुभयो ।

“नेपाली कांग्रेसले पनि सरकारको यो कदमको भत्सर्ना गरेको छ । यो सरकार एक पछि अर्को विधि प्रक्रिया, लोकतन्त्र र मुल्य मान्यतालाई उलंघन गर्दै आएको छ, त्यसैले यो नालायक भइसकेको छ, नेता लेखकले भन्नुभयो ।

यस्तो सरकारलाई परिवर्तन गर्न नसक्ने प्रतिनिधिसभा पनि दोषी रहेको तर्क गर्दै उहाँले विस्तारै विस्तारै जनता समक्ष जानुपर्ने आशय व्यक्त गर्नुभयो ।

उहाँले भन्नुभयो, “म फेरि एक पटक भन्छु, सरकार पहिलेदेखि नै बेकामको हुँदै आएको छ, प्रतिनिधिसभा पनि त बेकामको भयो नि ।”

उहाँले कांग्रेस लोकतन्त्र र संसदीय पद्धतिमा विश्वास गर्ने भएकाले चुनाव हुने भयो भने जति बेला पनि तयार रहेको बताउनुभयो ।