काठमाडौं । नेकपा माओवादी केन्द्रका नेता देवप्रसाद गुरुङले संवैधानिक व्यवस्थाअनुरुप प्रधानमन्त्री केपी शर्मा ओलीले बिश्वासको मत लिनुपर्ने बताउनुभएको ।

उहाँले दल विभाजन भएको अवस्थामा संविधानअनुसार प्रधानमन्त्री ओलीले ३० दिनभित्र बिश्वासको मत लिनुपर्ने उल्लेख गर्नुभयो । बिश्वासको मत नलिए प्रधानमन्त्री पद स्वतः खाली हुने नेता गुरुङको दावी छ ।

नेपाली रेडियो नेटवर्कको नेपाली बहसमा पत्रकार ऋषि धमलासँग कुरा गर्दै नेता गुरुङले संसद् विघटनको दिनदेखि नै सरकार कामचलाउ भइसकेको स्पष्ट पार्नुभयो । प्रतिनिधिसभा सदस्य नभएको व्यक्ति प्रधानमन्त्री बन्न नपाउने बताउँदै उहाँले अहिलेको सरकार कामचलाउ बनिसकेको दावी गर्नुभयो ।

कामचलाउ सरकारविरुद्ध माओवादी केन्द्रले अबिश्वासको प्रस्ताव दर्ता नगरेको नेता गुरुङले बताउनुभयो । सरकार आफैंले बिश्वासको मत लिएर देशलाई निकास दिनुपर्ने उहाँको तर्क छ ।

नेता गुरुङले प्रधानमन्त्री ओलीले संविधानलाई ध्वस्त पार्दै लगेको आरोप पनि लगाउनुभएको छ ।