एजेन्सी । विश्व विजेता फ्रान्सले विश्वकप छनौट चरणको सुरुवात बराबरीबाट गरेको छ ।

युरोपेली क्षेत्रको छनौट अन्तर्गत गएराति भएको आफ्नो पहिलो खेलमा फ्रान्स युक्रेनसँग १–१ को बराबरीमा रोकिएको हो ।

घरेलु मैदानमा भएको खेलमा फ्रान्सका लागि १९ औँ मिनेटमा एन्टोनी ग्रिजम्यानले गोल गरेर सुरुवाति अग्रता दिलाएका थिए ।

तर ५७ औँ मिनेटमा फ्रान्सका प्रेसनल किम्पेम्बेले आत्मघाती गोल गरेपछि युक्रेन बराबरीको अवस्थामा आएको हो ।

त्यसपछि थप गोल हुन सकेन र फ्रान्स बराबरीमै रोकियो । समूह डी अन्तर्गत नै भएको अर्को खेलमा फिनल्याण्ड र बोसनिया हर्जगोविनाले २–२ को बराबरी खेलेर अंक बाँडेका छन् ।

यसैगरी, विश्वकप फुटबल छनौट अन्तर्गत युरोपियन छनौटको पहिलो खेलमा पोर्चुगलले जित निकालेको छ ।

बुधबार राति भएको पहिलो खेलमा पोर्चुगलले अजरबैजानलाई १–० गोल अन्तरले पराजित गरेको हो ।

पोर्चुगलको जितमा आत्मघाती गोल निर्णायक बन्यो ।

खेलको ३६ औं मिनेटमा अजरबैजानका माक्सिम मेदभेदेबले आफ्नै पोस्टमा गोल गरेका थिए । जुन गोल पोर्चुगलको जितमा निर्णायक बन्यो ।

यस जितसँगै छनौटको समूह ए मा रहेको पोर्चुगलले ३ अंक जोडेको छ ।

यसै समूहको अर्को खेलमा सर्बियाले रिपब्लिक अफ आयरल्याण्डलाई ३–२ गोल अन्तरले हराएको छ ।

सर्बिया ३ अंक जोडेर समूहको शीर्ष स्थानमा रहेको छ ।

पोर्चुगल समूहको दोस्रो स्थानमा रहेको छ ।

यता युरोपियन छनोटको अर्को खेलमा भने बेल्जियमले वेल्समाथि पूनरागमन जित निकालेको छ ।

घरेलु मैदानमा गयराति भएको खेलमा बेल्जियमले वेल्सलाई ३–१ ले पराजित गरेको हो ।

बेल्जियमको जितमा केभिन डि ब्रुयन, थोर्गन हाजार्ड र रोमेलु लुकाकुले गोल गरे ।

वेल्सका ह्यारी विल्सनको एक गोल गरे । जितपछि समूह ‘ई’ मा बेल्जियमले ३ अंक जोडेको छ ।

यही समूहको अर्को खेलमा चेक रिपब्लिकले इस्टोनियामाथि ६–२ को सानदार जित हात पारेको छ ।