काठमाडौँ –प्रधानमन्त्री केपी शर्मा ओलीले भगवान राम नेपालमा जन्मिएको र अयोध्या नेपालमै पर्छ भनी विवादास्पद अभिव्यक्ति दिएपछि अहिले उहाँ आलोचनाको पात्र बन्नुभएको छ । उहाँले राम जन्मभूमि भारतको उत्तर प्रदेशमा नभई नेपालकै ठोरीमा रहेको सोमबार बालुवाटारमै आयोजित एक कार्यक्रमका क्रममा बताउनुभएको थियो ।

भारतले सांस्कृतिक तथ्य अतिक्रमण गरेको भनी उहाँले दिएको अभिव्यक्तिको सर्वत्र आलोचना भएरहेको छ । सामाजिक सञ्जालमा प्रधानमन्त्री व्यंग्य र आलोचनाको सिकार बन्नुभएको छ । भानु जयन्तीका अवसरमा प्रधानमन्त्री निवासमा भएको कार्यक्रममा प्रधानमन्त्री ओलीले भारतले ‘नक्कली अयोध्या’ खडा गरेर सांस्कृतिक तथ्यमाथि अतिक्रमण गरेको बताउनुभएको थियो ।

यस्तै पूर्व प्रधानमन्त्री एवं जनता समाजवादीका वरिष्ठ नेता बाबुराम भट्टराईले प्रधानमन्त्रीको वचन र कर्मले सीमा नाघ्दै गएको बताउनुभएको छ । अब प्रधानमन्त्री ओलीलाई छाडा छोड्नु खतरनाक हुने उहाँले उल्लेख गर्नुभएको छ ।

यस्तै पूर्वपरराष्ट्रमन्त्री रमेशनाथ पाण्डेले धर्म राजनीति र कूटनीतिभन्दा माथि भएकाले प्रधानमन्त्रीको भनाइले लज्जित बनाएको बताउनुभएको छ । पूर्वगृहमन्त्री समेत रहनुभएका सत्तारुढ दलका नेता भीम रावलले प्रधानमन्त्रीको अभिव्यक्ति आपत्तिजनक रहेको बताउनुभयो । उहाँले कालापानी, लिपुलेक र लिम्पियाधुरालाई नेपालको नक्सामा समेटिएको र त्यहाँबाट भारतीय फौँज हटाउनुपर्ने बेला प्रधानमन्त्रीले अयोध्याको प्रसंग झिकेर विषयान्तर गर्न खोजेको आरोप लगाउनुभयो।

यता परराष्ट्र मन्त्रालयले अयोध्याबारे प्रधानमन्त्री केपी शर्मा ओलीको अभिव्यक्तिबारे स्पष्टीकरण दिएको छ । मन्त्रालयले विज्ञप्ति जारी गर्दै प्रधानमन्त्रीको अभिव्यक्ति राजनीतिक विषयसँग नजोडिएको बताएको छ । प्रधानमन्त्रीको अभिव्यक्ति राजनीतिक विषयसँग जोडिएको छैन र कसैको भावनामा चोट पु¥याउने आशय नरहेको विज्ञप्तिमा उल्लेख छ ।

प्रधानमन्त्रीले श्रीराम र उहाँसँग सम्वद्ध स्थानबारे धेरै किंवदन्ती रहेको र नयाँ तथ्यहरु प्राप्त गर्न रामायणले प्रतिनिधित्व गर्ने गहन सांस्कृतिक भूगोलको थप अध्ययन, अनुसन्धानको महत्वमाथि जोड मात्र दिएको परराष्ट्र मन्त्रालयले जनाएको छ ।