काठमाडौँ – नेपाल कम्युनिष्ट पार्टी नेकपा (प्रचण्ड–नेपाल) समूहका अध्यक्ष पुष्पकमल दाहाल प्रचण्डले जनयुद्धलाई कुहिएको फर्सी भन्ने प्रधानमन्त्री केपी शर्मा ओलीको अभिव्यक्तिप्रति कडा आपत्ति जनाएका छन् ।

साथै महान जनयुद्धलाई कुहिएको फर्सी भन्दा पनि सहेर बस्ने हाल ओली समूहतिर लागेका पूर्व माओवादी नेता देखेर आफूलाई झनै लाज लागेर आएको प्रचण्डले बताउनुभयो ।

पोखरामा मंगलबार आयोजित कार्यकर्ता भेलालाई सम्बोधन गर्दै प्रचण्डले जनयुद्धलाई कुहिएको फर्सी भन्दा ओलीतिर लागेका नेताहरुले सुन्न कसरी सकेको हो भनेर आफू चकित परेको बताउनुभयो ।

केही दिन अघि ओली समूहको कार्यकर्ता भेलालाई सम्बोधन गर्दै प्रधानमन्त्री केपी शर्मा ओलीले ‘महान जनयुद्ध’ फर्सी कुहिएझैँ कुहिएको बताउनुभएको थियो । ‘महान जनयुद्ध के भो ? फर्सी कुहिएझैँ कुहियो’ ओलीले यस्तो भन्दा उपस्थित कार्यकर्ताहरुले ताली बजाएर स्वागत गरेका थिए ।

जनयुद्धलाई कुहिएको फर्सी भनेर अपमान गर्ने प्रधानमन्त्री केपी शर्मा ओलीले राजनीतिक बेइमानी गरेको प्रचण्डको भनाई छ । उहाँले जनयुद्ध ठीक थियो भनेर राजनीतिक प्रतिवेदनमा केपी शर्मा ओली आफैले हस्ताक्षर गरेको बताउनुभयो ।

जनयुद्ध कुहिएको फर्सी थियो भने त्यो ठीक हो भनेर ओलीले गरेको हस्ताक्षर किर्ते थियो त भनेर प्रचण्डले प्रश्न गर्नुभयो । यदि हस्ताक्षर किर्ते हो भने केपी ओलीले भन्न सक्नुपर्ने उहाँले बताउनुभयो ।

प्रचण्डले के महान जनयुद्ध कुहिएको फर्सी नै हो त भनेर प्रश्न गर्न हाल ओली समूहमा लागेका पूर्व माओवादी नेताहरुलाई प्रश्न गर्न कार्यकर्ताहरुलाई पनि अपिल गर्नुभयो ।

जनयुद्धको जगमा राजनीतिक उचाई हासिल गरेका केही नेताहरु अहिले ओली समूहमा लागेका छन् । उनीहरुलाई ओलीले मन्त्रीसहित पार्टीका महत्वपूर्ण जिम्मेबारी सुम्पेका छन् । तर ओलीले जनयुद्धको अपमान गर्दा उनीहरु मौन छन् । बरु उनीहरु प्रचण्ड–नेपाल समूहको विरोधमा खरो उत्रेका छन् ।

प्रचण्ड समूह परित्याग गरी ओली समूहमा लाग्नुभएका गृहमन्त्री रामबहादुर थापा बादलले विभाजनकारीहरुको साथ छाडेर आफू पार्टीको मुल नेतृत्वको रक्षामा लागेको बताउँदै आउनुभएको छ ।
दुई फरक राजनीतिक धारबाट आए पनि नेकपा हिजो एक थियो । कानुनी रुपमा अहिले पनि विभाजन भइसकेको छैन । प्रभावशाली नेताहरुले फेरि पनि पार्टी एकजुट हुन सक्ने सम्भावनालाई नकारेका छैनन् भलै त्यसले केही समय लिन सक्ला ।

तर अहिले एक अर्काविरुद्ध गालीगलौजको तहमा उत्रेर कम्युनिष्ट पार्टीका नेता तथा कार्यकर्ताहरुले उपद्रो मच्याइरहेका छन् । यस्तो कार्यले कम्युनिष्ट शब्दकै बदनाम गरिरहेको भन्दै कतिपयले चिन्ता र अधिकांशले आलोचना गरिरहेका छन् ।