काठमाडौं । प्रमुुख प्रतिपक्षी दल नेपाली कांग्रेस संसदीय दल कार्यसमितिको बैठक आज बस्दै छ । प्रधानमन्त्री केपी शर्मा ओलीले संवैधानिक परिषद् सम्वन्धी अध्यादेश फिर्ता लिन र संसद अधिवेशन बोलाउन आनाकानी गरेको बारेमा काँग्रेसले आज छलफल गर्न लागेको हो । संसदीय दलको कार्यसमितिले संसद अधिवेशन बोलाउन र अध्यादेश फिर्ता गर्न दवाव दिनका लागि रणनीति तयार पार्ने जनाइएको छ ।

कार्यसमिति गठन भएपछि दोस्रो पटक बस्न लागेको बैठक विषेश गरेर यीनै दुई विषयमा केन्द्रीत हुने सांसदहरुले अनुमान गरेका छन् । संघीय संसद भवन नयाँ बानेश्वरमा साढे १० बजेपछि बस्नेगरी बैठक बोलाइएको काँग्रेसले जनाएको छ । प्रधानमन्त्री ओलीले केही दिन अगाडि एकाएक अध्यादेश जारी गर्दै संवैधानिक परिषद् सम्वन्धी व्यवस्था परिवर्तन गरेपछि काँग्रेसको शिर्ष नेताहरुको बैठक बसेको थियो ।

बैठकले अध्यादेश तत्काल फिर्ता लिन र संसद अधिवेशन बोलाउन माग गरेको थियो । तर दुवै मागलाई प्रधानमन्त्री ओलीले अटेर गरेकाले थप दवाव दिन संसदीय दलको कार्य समितिको बैठक बोलाइएको काँग्रेस सचेतक पुष्पा भुसालले नेपाली नेटवर्कलाई जानकारी दिनुभयो ।