काठमाडौं । नेकपा एमालेका प्रचार विभाग प्रमुख राजेन्द्र गौतमले मन्त्रीमण्डल फेरबदल गर्ने प्रधनमन्त्रीको अधिकार भएको बताउनुभएको छ ।

मन्त्रीहरुले तोकिएको कार्य सफलतापूर्वक गरेनन् भने फिर्ता बोलाएर सम्भावना बोकेका नयाँ अनुहारलाई ल्याउन आवश्यक रहेको उहाँको भनाइ छ ।

नेपाली रेडियो नेटवर्कको नेपाली बहसमा पत्रकार ऋषि धमलासँग कुरा गर्दै नेता गौतमले सरकारको गठनको एक वर्षको अवधिमा केहि बाहेकका मन्त्रीहरुले चित्तबुझ्दो र देखिने काम गर्न नसकिरहेको अवस्था रहेकाले अब प्रधानमन्त्रीले मन्त्रीफेरबदल गर्नुपर्ने समय आएको स्पष्ट पार्नुभयो ।

मन्त्रीहरु अब जनतामैत्री बनेर काम गर्नुपर्ने भएकाले अहिलेको वर्तमान सरकारबाट कसैलाई पनि निराश हुनुपर्ने स्थिती सिर्जना नहोस भन्ने कुरालाई ध्यानमा राखेर अगाडि बढ्नुपर्नेमा उहाँको सुझाव रहेको छ । यस्तै अर्को प्रसंगमा उहाँले गठबन्धनमा कुनै पनि मतभेद नभएको बताउनुभएको छ ।

कांग्रेस र एमाले समिकरणको सरकारले देश र जनताको हितबाहेक अरु काम नगर्ने र गर्न पनि नदिने स्पष्ट पार्दै नेता गौतमले वर्तमान गठबन्धन आगामी निर्वाचनसम्मै रहने दाबी गर्नुभयो ।

यस्तै उहाँले सरकारले राम्रो काम गरिरहेको र जनताको विश्वास जितेको देखेर प्रतिपक्ष अत्तालिएको आरोपसमेत लगाउनुभयो ।