२०८३, श्रावण ९ गते
- यो साता चर्चामा :
काठमाडौं । नेकपा एमालेका उपाध्यक्ष युवराज ज्ञवालीले वर्तमान सरकारले गर्ने काममा केहि कमिकमजोरी भएको बताउनुभएको छ ।
जनतामा व्यापक निराशा बढिरहेको र कामहरु जुन गतिमा हुनुपर्ने हो त्यसरी भइरहेको अवस्था नरहेकाले अब सरकार यसतर्फ केन्द्रित भएर लाग्नैपर्ने बेला आएको नेता ज्ञवालीको भनाइ रहेको छ ।
नेपाली रेडियो नेटवर्कको नेपाली बहसमा पत्रकार ऋषि धमलासँगकुरा गर्दै नेता ज्ञवालीले जनताका तत्कालका समस्याहरुको सम्बोधन गर्ने गरि सरकार तदारुकतासाथ अगाडि बढ्नुपर्ने सझाव दिनुभयो ।
वर्तमान सरकार गठनपछि केहि हुँदै नभएको भन्ने कुरा गलत भएको दाबी गर्दै उहाँले प्रतिपक्षले जसरी सरकारविरुद्ध भ्रम फैलाइरहेका छन् यो सबै सरकारदेखि बाहिरिनुपर्दाकोे छट्पटीबाहेक अरु नभएको बताउनुभयो ।
यस्तै, सरकार असफल भयो, अलोकतान्त्रिक भयो भनेर भन्दै हिड्नु पनि प्रतिपक्षको पिडा र जनता भड्काउने खेल भएको नेता ज्ञवालीको आरोप रहेको छ ।
विभिन्न समस्या र अवरोधकाबीच पनि आफूले गर्नुपर्ने काम र प्रतिवद्धता बिर्सन सरकारलाई छुट नभएको समेत उहाँको सुझाव रहेको छ ।
कांग्रेस र एमालेको समिकरणमा बनेको शक्तीशाली सरकारबाट जनताले धेरै आसा र बिश्वास गरेकाले सरकारलाई काम नगरेर समय खेर फाल्न छुट नभएको बताउँदै उहाँले जनताले अनुभुति गर्नेगरि काम गर्न र नतिजा दिन सरकार प्रतिवद्ध रहेकोसमेत स्पष्ट पार्नुभयो ।
