काठमाडौं । स्वास्थ्य तथा जनसंख्या मन्त्री प्रदीप पौडेलले प्रधानमन्त्री केपी शर्मा ओलीलाई भेटेर स्वास्थ्य बीमा सुधार सम्बन्धी कार्ययोजना प्रस्तुत गर्नुभएको छ । स्वास्थ्य तथा जनसंख्या मन्त्रालयका अतिरिक्त सचिव दीपेन्द्ररमण सिंहको नेतृत्वमा तयार पारेको कार्ययोजना सहितको प्रतिवेदन मन्त्री पौडेलले बुधबार प्रधानमन्त्रीलाई बुझाउनु भएको हो ।
कार्ययोजना बनाएर मन्त्रीपरिषद्को बैठकबाट स्वास्थ्य बीमामा सुधार गर्ने सरकारको तयारी छ । स्वास्थ्य बीमाका पक्षलाई सुधार गरेर रू. पाँच लाख पुर्याउने गरी आफुले तयारी गरिरहेको मन्त्री पौडेलले बताउनुभयो ।
उहाँका अनुसार प्रधानमन्त्रीलाई बुझाइएको प्रतिवेदनमा पनि बीमा रकम बढाएर पाँच लाख पुर्याउन सकिने आधारहरु समावेश छन् । अब मन्त्रालयको निर्णयपछि संसद्को आगामी अधिवेशनमार्फत स्वास्थ्य बीमा ऐन संशोधनको प्रक्रिया अघि बढाइनेछ ।