काठमाडौं । नेपाली कांग्रेसका नेता तथा संसद्को राज्य व्यवस्था तथा सुशासन समितिका सभापति रामहरि खतिवडाले सहकारी प्रकरणमा गृहमन्त्री रवि लामिछानेसहित समग्र संकटग्रस्त सहकारीमाथि छानबिन हुनुपर्ने बताउनुभएको छ । सरकारले छानबिन समिति बनाएर मुख्य दोषी लामिछानेमाथि छानबिन गरेन भने कुनैपनि हालतमा संसद् चल्न नदिने चेतावनी दिनुभएको छ ।
नेपाली रेडियो नेटवर्कको नेपाली बहसमा पत्रकार ऋषि धमलासँग कुराकानी गर्दै उहाँले व्यक्तिमाथि छानबिन हुँदैन भनेर दोषीलाई बचाउने काममा सरकार नलाग्न चेतावनी दिनुभयो । उहाँले कांग्रेसको मागलाई ख्याल ख्याल नठान्न सचेत गराउँदै गृहमन्त्री मात्र होइन दोषी भए प्रधानमन्त्रीमाथि पनि छानबिन गरेर कारबाही गर्नुपर्ने बताउनुभयो ।
प्रधानमन्त्री पुष्पकमल दाहाल प्रचण्डले गृहमन्त्री एकदम निष्पक्ष, इमानदार हुनुहुन्छ भन्ने अभिव्यक्ति दिने गरेको बताउँदै उहाँले जानकारी नभएको कुरामा नबेल्न सुझाउनुभयो । प्रधानमन्त्री नै यसरी हल्का रुपमा हुने पद्धतिले जनतामा राम्रो सन्देश नजाने बताउनुभयो ।
आफूहरूले कसैलाई दोषी भनेर दाबी नगरेको बताउँदै खतिवडाले निष्पक्ष छानबिन गर्न सरकार तयार हुनुपर्ने बताउनुभयो । यदि छानबिनपछि कोही निर्दोष भए सफाइ पाउने तर दोषी भए कारबाहीको दायरामा आउने उहाँको भनाई छ ।
