काठमाडौं । लुम्बिनी प्रदेशबाट राष्ट्रिय सभा सदस्यका लागि भएको निर्वाचनमा गठबन्धनका उम्मेदवार विजयी भएका छन् । आज सम्पन्न निर्वाचनको मत परिणामअनुसार महिला क्लस्टरमा नेपाली कांग्रेसकी विष्णुकुमारी सापकोटा र अन्य कलस्टरमा नेकपा माओवादी केन्द्रका झक्कुप्रसाद सुवेदी विजयी हुनुभएको हो ।

नेकपा एमालेबाट झपेन्द्रबहादुर घर्ती क्षेत्री, तुलसा कुमारी केसीले उम्मेदवारी दिनुभएको थियो भने राप्रपाबाट विजया लक्ष्मी सिंह र जनमत पार्टीबाट बालगोविन्द चौधरी उम्मेदवार हुनुहुन्थ्यो।

विजयी विष्णुकुमारी सापकोटाले ५ हजार ४३५ मत भार प्राप्त गरी राष्ट्रिय सभा सदस्यमा निर्वाचित हुनुभएको हो। उहाँलाई सत्तारुढ गठबन्धन दलको समर्थन रहेको थियो । उहाँसँगै प्रतिस्पर्धा गर्नुभएकी नेकपा एमालेकी तुलसा केसीले २ हजार ८६७ मतभार प्राप्त गर्नुभएको छ ।