काठमाडौँ – कोरोना भाइरसको महामारी नियन्त्रणका लागि सरकारले गरिरहेका प्रयासहरुप्रति सत्तारुढ दल नेकपाकै नेताहरुले चरम असन्तुष्टि पोखेका छन् । उनीहरुले सरकारले कोरोना महामारी नियन्त्रणका लागि प्रयत्न गरे पनि त्यो पर्याप्त नरहेको बताएका छन् ।

नेकपाका नेता रघुजि पन्तले सरकारको साधन श्रोत जति थियो त्यसको भरपुग प्रयोग महामारी निययन्त्रणका लागि हुन नसकेको बताउनुभयो ।
महामारी निययन्त्रणका लागि सबै पक्षको सहयाग लिएर अघि बढ्नुको साटो सरकारका अधिकांश निर्णयहरु एक पछि अर्काे विवादमा मात्रै तानिएको उहाँको टिप्पणी छ ।

नेकपाका अर्का एक प्रभावशाली नेता हरिबोल गजुरेलले पनि महामारी नियन्त्रणमा सरकारको प्रयास असफल भएको टिप्पणी गर्नुभयो । विपक्षी दलहरुसहित सबै पक्षसँग मिलेर एकीकृत रुपमा महामारीको सामना गर्नुपर्नेमा त्यसो हुन नसकेको उहाँले बताउनुभयो ।

सत्तारुढ दलभित्र प्रधानमन्त्री केपी ओली निकट मानिने नेताहरुले समेत कोरोना महामारीमा सरकारको प्रयासको आलोचना गरेका छन् । प्रधानमन्त्री निकट मानिने नेता घनश्याम खतिवडाले सरकारले गरेका सम्पूर्ण प्रयास सफल नदेखिएको बताउनुभयो । कोरोना केही होइन भनेर प्रचार गर्ने समूहले पनि महामारी नियन्त्रणको प्रयासमा बाधा पु¥याएको उहाँको आरोप छ ।

कोरोना महामारी नियन्त्रणमा सरकारको प्रयास पूर्ण रुपमा असफल भएको सत्ताधारी नेताहरुले नै बताइरँदा प्रधानमन्त्री केपी ओली भने सकेजति प्रयास गरिएको र त्यसले सार्थकता पनि पाएको दाबी गरिरहनुहुन्छ ।

विश्व नै यो महामारीका लागि तयार नरहेका बेला नेपालले गरेको प्रयास प्रंशसायोग्य नै रहेको कतिपय सत्ताका बचाउमा उत्रनेहरु बताउँछन् । तर महामारी नियन्त्रणका लागि स्वास्थ्य सामग्री खरिदमा आएको भ्रष्टाचारको गन्धले सरकारको नियत प्रष्ट पार्छ ।