काठमाडौं। सेयर बजार परिसुचक नेप्से पुनः आज पनि राताम्मे भएको छ। हिजो सामान्य अंकले हरियो रहेको शेयर बजार आज फेरि उस्तै अंकले राताम्मे बनेको हो।

हिजो ५ अंकले सकारात्मक रहेको पनि आज फेरी पाँचै अंकले ऋणात्मक रहेर १९ सय ९३ कायम भएर रोकियो। कारोबारको सुरुवाती समयमा बजार सकारात्मक रहेर २ हजारमाथि पुगे पनि वृृद्धि अन्तिमसम्म टिक्न नसक्दा कारोबार आज अर्ब नपुग्दै खुम्चियो।

आज निजीबन बीमा, व्यापार, लगानी र सामूहिक लगानी कोष नगन्य अंकले हरियो रहेबाहेक बाँकी समूह रातो रहे। होटल तथा पर्यटन, उत्पादनमूलक, विकास बैंक र जलविद्युत समूह आधा प्रतिशत बढीले ओरालो लाग्दा बाँकी समूह सामान्य अंकले ऋणात्मक रहे।

आज नेपाल स्टक एक्सचेन्जमा २ सय ७८ कम्पनीको ४० लाख कित्ता शेयर जम्मा ८६ करोड बराबरमा किनबेच भएको एक्सचेन्जले जनाएको छ।आज १ सय ४४ कम्पनीको मूल्य घट्दा ६९ को बढ्यो।

घटेको बजारमा पनि कुथरी बुखेरी हाइड्रोका लगानीकर्ताले १० प्रतिशत कमाउने क्रम जारी रहँदा ग्लोबल आईएमई ब्यालेन्स फण्डको शेयर सकारात्मक सर्किट लेबलमा कारोबार भयो।