काठमाडौं । नक्कली भुटानी शरणार्थी बनाएर अमेरिका पठाइदिने भन्दै नेपाली नागरिकबाट पैसा उठाएर भएको ठगी प्रकरणमा संलग्न भएको आरोपमा पक्राउ परेका पूर्वगृहमन्त्री तथा नेपाली कांग्रेसका नेता बालकृष्ण खाँणको आज बयान लिइने भएको छ ।
वैशाख २७ गते नै पक्राउ परेका खाँणको बयान हुन सकेको थिएन । घटनाका सम्बन्धमा प्रहरीले सोधपुछ गरे पनि उनको बयान भने ‘रेकर्ड’ गरिएको थिएन ।
सरकारी वकिल समेतको उपस्थितमा प्रहरीले आज खाँणको बयान लिन लागेको हो । जिल्ला सरकारी वकिलको कार्यालय काठमाडौंका प्रमुख अच्युतमणि न्यौपानेले आज दिनभर बयान गर्न भनेर हिजो नै निर्देशन दिनुभएको थियो ।
सम्भव भएसम्म खाँणको बयान आज नै सक्ने प्रहरीको तयारी छ । प्रहरीले अबको २ दिनमा अनुसन्धान सकेर जिल्ला सरकारी वकिलको कार्यालयलाई प्रतिवेदन बुझाउने तयारी गरेको छ ।
