काठमाडौं । आसन्न फागुन २५ गतेको राष्ट्रपति निर्वाचनलाई लिएर दलहरूको चहलपहल बढेको छ । आआफ्ना उम्मेदवारलाई मत माग्नका निम्ति नेपाली कांग्रेस र नेकपा एमाले सक्रिय भएका छन् । नेकपा एमाले त हालको गठबन्धनलाई कसरी भत्काउन सकिन्छ भन्ने दाउ कुरेर बसेको देखिन्छ । आज एमालेका शीर्ष नेताहरूले नेम्बाङलाई मत मागेका छन् । मत माग्दै नेकपा एकीकृत समाजवादीको पार्टी कार्यालयमा पुगेका नेताहरूलाई नेकपा एसले कांग्रेस उम्मेदवारको प्रस्तावक र समर्थक भएका कारण राष्ट्रपति निर्वाचनमा सहयोग गर्न नसक्ने जवाफ फर्काएको छ । नेकपा एकीकृत समाजवादीका अध्यक्ष माधवकुमार नेपालले भेटघाटमा आफू रामचन्द्रको प्रस्तावक भएकोले सहयोग गर्न नसकिने जवाफ फर्काउनुभएको थियो । साथै उहाँले आफ्ना सबै सांसदहरूले पौडेललाई मत दिने समेत जानकारी दिनुभयो ।
आजै, राष्ट्रपति चुनावमा भोट माग्न नेम्बाङसहितको एमाले टोली राष्ट्रिय स्वतन्त्र पार्टी रास्वपाको कार्यालयमा पुगेको थियो । नेम्बाङले राष्ट्रपति चुनावमा मत दिएर सहयोग गर्न राष्ट्रिय स्वतन्त्र पार्टीलाई आग्रह गर्नुभएको थियो । राष्ट्रपतिमा कसलाई सहयोग गर्ने भनेर रास्वपाले अहिलेसम्म आधिकारिक निर्णय गरेको छैन । यता, नेकपा एमाले पनि आफूले मागेको सहयोग प्राप्त हुने अपेक्षामा छ । एमाले प्रचार विभाग प्रमुख पृथ्वीसुब्बा गुरुङले भने नेकपा एसबाट सकारात्मक प्रतिक्रिया आएको बताउनुभएको छ ।
यता, राष्ट्रपतिका उम्मेदवार रामचन्द्र पौडेलले आफूलाई मत माग्दै सांसदहरूलाई पत्राचार गर्नुभएको छ । उहाँले आफ्नो लेटर प्याडमा सबै सांसदहरूलाई सम्बोधन गरी पत्र लेखेर मत माग्नुभएको हो । आजको आठदलीय गठबन्धनको प्रशिक्षण भेलाले पनि पौडेलको पक्षमा माहौल जुटाउन मदत पुगेको कांग्रेस प्रवक्ता डा. प्रकाशशरण महतले बताउनुभयो ।।
नेपाली कांग्रेस–माओवादी केन्द्रसहितका ८ राजनीतिक दलले आज काठमाडौंमा संघीय सांसदहरूलाई अभिमुखीकरण गरेको छ । राष्ट्रपतिको निर्वाचन आउँदो २५ गते हुँदैछ । निर्वाचन आयोगले आचारसंहिताको पालना गर्दै चुनावलाई सभ्य बनाउन राजनीतिक दलहरूलाई आग्रह गरेको छ ।
