काठमाडौं । राष्ट्रिय स्वतन्त्र पार्टीका सांसद सन्तोष परियारले रास्वपा र गृह मन्त्रालयको आडमा कतै केहि चलखेल भइरहेको हो की भन्ने आशंक व्यक्त गर्नुभएको छ ।

नेपाली रेडियो नेटवर्कको नेपाली बहसमा पत्रकार ऋषि धमलासँग कुरा गर्दै पार्टीका प्रमुख सचेतकसमेत रहनुभएका परियारले आफ्नो पार्टीप्रति प्रधानमन्त्री पुष्पकमल दाहाल प्रचण्डको पछिल्लो धारणा र विचार बुझ्दा अहिले गृह मन्त्रालय र रास्वपाको कुराले मात्रै गठबन्धनमा बहस, छलफल भैरहेको र यहि विषयमा मात्रै आजको राजनीतिक अडिएको भन्ने नलागेको स्पष्ट पार्नुभयो ।

जिम्मेवारीपूर्वक राजनीतिक गर्छौ भनेर आएको बताउँदै सांसद परियारले आफूहरुलाई बहसको केन्द्रमा राखेर अन्य राजनीतिक घटनाक्रम हुन्छ भने टुलुटुलु हेरेर नबस्ने चेतावनी दिनुभयो । यस्तै सरकारमा रहने वा बाहिरिने भन्ने निर्णय गर्न आज पनि पार्टीको बैठक बस्दैछ । आजको बैठकमा निर्णायक छलफल गर्ने परियारले बताउनुभयो ।

बैठक बिहान साढे ११ बजे बस्ने छ । नागरिकता मुद्दामा सर्वोच्च अदालतको फैसलासँगै गुमेको गृह मन्त्रालय पुनः पाउनुपर्ने राष्ट्रिय स्वतन्त्र पार्टीको माग छ । तर, प्रधानमन्त्री पुष्पकमल दाहाल प्रचण्डले सर्वोच्चको पूर्णपाठ नआइसकेको तथा सभापति रवि लामिछानेको राहदानी विवाद छानबिनको विषय बनेकाले अस्वीकार गर्दै आउनु भएको छ ।