काठमाडौं । शुक्रबारदेखि लामो, मध्यम र छोटो दूरीका सार्वजनिक सवारी साधन सञ्चालनमा आउँदैछन् ।

यातायात व्यवसायी र मजदूरको संयुक्त कार्यदलले आज यातायात मजदुर र यात्रुले अपनाउनुपर्ने स्वास्थ्य सुरक्षाका मापदण्ड सार्वजनिक गरेको छ ।
कार्यदलद्धारा जारी विज्ञप्तिमा यात्रुलाई यात्रा सुरु गर्नुअघि स्यानिटाइजरको व्यवस्था गर्नुपर्ने र यात्रुले यात्राभर अनिवार्य मास्क लगाउनुपर्ने उल्लेख छ ।
त्यस्तै, चालक, सहचालक, परिचालक, बुकिङ कर्मचारीलगायत यातायात मजदुरले मास्क, स्यानिटाइजर, पन्जा, फेस भाइजरलगायत स्वास्थ्य सुरक्षाका उपकरण अनिवार्य रुपमा लगाउन आग्रह गरिएको छ ।

६ महिनापछि लामो दूरीका सार्वजनिक सवारी साधन सञ्चालनमा आउन लागेका हुन् । यसमा जोर–बिजोर प्रणाली लागु हुने छैन ।

त्यसैगरी, वायुसेवा सञ्चालकहरुले ५० प्रतिशत् मात्र यात्रु राखेर उडान गर्नुपर्ने सरकारको निर्णयमा असहमति जनाएका छन् ।

आज संस्कृति, पर्यटन तथा नागरिक उड्डयन मन्त्रालयमा भएको छलफलमा १ असोजमा उडान खुला गर्ने निर्णय सार्वजनिक भए पनि सोही दिन जहाज उड्न नसक्ने र ५० प्रतिशत यात्रु राखेरसमेत उडान सम्भव नभएको अडान दोहो¥याएका छन् ।

मन्त्रालयले भने यसअघि तोकिएको सबैभन्दा माथिल्लो दरमा भाडा लिन पाउनेगरी सहमति गर्न प्रस्ताव गरेको छ ।

तर, व्यवसायीले भने भर्खरै महामारीका कारण घरभित्रै थुनिएर बसेका यात्रुले मँहगो भाडा तिरेर यात्रा गर्न नसक्ने भन्दै असहमति जनाएका हुन् ।