काठमाडौं ।रसुवागढी–केरुङ नाका माघ २० गतेसम्मका लागि बन्द भएको छ । चीनले नयाँ वर्षका लागि भनेर आगामी फेब्रुअरी ३ सम्म नाका बन्द गरेको हो ।

रसुवा भन्सार कार्यालयका प्रमुख भन्सार अधिकृत नारायणप्रसाद भण्डारीका अनुसार करिब एक महिना अवधिमा नेपालबाट अहिलेसम्म करिब छ करोड बराबरको ३९ कन्टेनर सामान चीनतर्फ गएको छ ।

चीनबाट भने दैनिक १४ कन्टेनर सामान नेपाल आउने गरेकोमा आजबाट त्यो पनि बन्द भएको छ। कोभिड महामारीपछि ठप्प प्रायः रहेको उक्त नाका गत पुस दोस्रो साताबाट खुलेको थियो तर नेपाल र चीनबीचको व्यापार अझै लयमा फर्किन सकेको छैन ।

नेपालमा ०७२ सालको भूकम्प र चीनबाट फैलिएको कोरोना महामारीको असर दुई देशको व्यापारमा नराम्रोसँग देखिएको छ ।चालु आर्थिक वर्षको पाँच महिना अर्थात् गत मङ्सि र मसान्तसम्ममा तातोपानी भन्सारबाट रु चार अर्ब ४२ करोड २४ लाख २३ हजार बराबरको वस्तु आयात भएको देखिन्छ । नेपालबाट चीनमा हुने वस्तु निर्यात भने शून्य छ ।