काठमाडौं । संकटा क्लबले २२ औं संस्करणको आहा रारा पोखरा गोल्डकप जितेको छ ।

संकटाले पोखरा रंगशालामा आज भएको फाइनल खेलमा भुटानी युथ स्पोर्ट्स क्लब (बीवाइएससी)लाई ३-२ ले हराउँदै संकटाले उपाधि जितेको हो ।

खेलको निर्धारित समय २र२ गोलको बराबरमा सकिएको थियो । त्यसपछि धकेलिएको अतिरिक्त समयको अन्तिममा संकटाका लागि कप्तान सुनील वलले निर्णायक गोल गर्दै उपाधि जिताएका हुन् ।

मेसुके ओलामाउ अघि बढाएको बललाई स्टेफन बिनोङले निकालेको पासमा सुनिलले गोल गरेका थिए । त्यसअघि संकटाका लागि सुरज ज्यू ठकुरी र मेसुकेले एकएक गोल गरेका थिए । बीवाइएससीका लागि रेने सान्टिलोन र विल्स ग्रिफितले एकएक गोल गरे ।

प्रतियोगिताको विजेता संकटा ले १२ लाख रुपैयाँ पाएको छ भने उपविजेता बीवाइएससीले ६ लाख रुपैयाँमै चित्त बुझाएको छ ।