काठमाडौं । सिट बाँडफाँटको टुंगो लगाउन सत्ता गठबन्धन कार्यदलको बैठक आज मंगलबार पनि बस्दैछ।

कार्यदलका सदस्य रकम चेम्जोङका अनुसार आजको बैठक साँझ ६ बजे बोलाईएको छ । नेपाली रेडियो नेटवर्कको नेपाली बहसमा पत्रकार ऋषि धमलासँग कुरा गर्दै जनता समाजवादी पार्टीका नेतासमेत रहनुभएका चेम्जोङले सिट बाँडफाँडमा सहमतिको नजिक पुगेकाले अब चाँडै टुङ्गोमा पुग्ने बताउनुभयो ।

दलहरुले दाबी गर्दै आइरहेको सिट संख्याबाट पछि हट्दै आइरहेकाले १६५ सिटमै सबैका लागि न्यायोचित र सम्मानजनक हुनेगरी अब आजको बैठकबाट निर्णय लिइने नेता चेम्जोङको भनाइ छ ।

हिजो सोमबार दिनभर बसेको बैठक बिना निष्कर्ष टुंगिएपछि आज पुनः बैठक बस्ने भएको हो । आज सिट बाँडफाँट टुंगो लगाउने र प्रतिवेदन शीर्ष नेताहरुलाई बुझाउने कार्यदलको तयारी रहेको उहाँले बताउनुभयो । उहाँका अनुसार हिजोको बैठकमा १६५ वटै निर्वाचन क्षेत्रमा दलहरूको अवस्थाबारे छलफल भएको थियो ।

संघ र प्रदेशको खाकासहित सिट संख्यामा सहमति जुटाएर आज नै प्रतिवेदन तयार पारिने उहाँले बताउनुभयो । नेता चेम्जोङले आजसम्म टुंग्याउने गरी सोमबारको बैठक टुंगिएको जानकारी दिँदै सिट बाँडफाँटका सम्बन्धमा गठबन्धनमा आबद्ध दलहरुले आफ्नो अडानमा लचकता अपनाएकाले सङ्ख्या बारेको बहस साँघुरिँदै गएको बताउनुभयो ।