काठमाडौं । नेपाली कांग्रेसका सभापति शेरबहादुर देउवा शेखर कोइराला पक्षमाथि खनिनुभएको छ । उहाँले आफूलाई असहयोग जारी रहे तेस्रो पटक पनि पार्टी सभापति बन्ने चेतावनी दिनुभएको छ ।
कांग्रेस केन्द्रीय समिति बैठकमा बोल्दै देउवाले शेखर कोइराला पक्षले आफूविरुद्ध भेला गर्दै पार्टी प्यालेस चहारेको भन्दै आक्रोशसमेत पोख्नुभयो । भेला आयोजना गर्ने भए पार्टी कार्यालयमै गर्न पनि उहाँले सुझाव दिनुभएको छ ।
सोमबारदेखि जारी बैठकमा नेताहरूले धारणा राख्ने क्रम नसकिएपछि आजको बैठक भोलि पुनः बस्ने गरी स्थगित भएको छ ।
भोलि कांग्रेसबाट सरकारमा सहभागी मन्त्रीहरूले केन्द्रीय सदस्यहरूले उठाएका प्रश्नको जवाफ दिने भएका छन् ।
केन्द्रीय सदस्यहरूले सरकारको कामकारबाहीको विषयमा पनि प्रश्न उठाएपछि भोलिको बैठकमा मन्त्रीहरूले पनि जवाफ दिने कार्यक्रम राखिएको नेताहरूले बताएका छन् । भोलि नै पदाधिकारीले पनि आफ्नो धारणा राख्नेछन् ।
