काठमाडौं । नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ र अभिनेता राजेश हमालबीच भेटवार्ता भएको छ।
प्रचण्डलाई भेट्न हमाल शुक्रबार बिहान उहाँको निवास खुमलटार पुग्नुभएको थियो ।
उनीहरूबीच समसामयिक विषयमा छलफल भएको भेटमा सहभागी कलाकार चेतन सापकोटाले बताउनुभएको छ ।
‘उहाँहरूबीच अहिलेसम्म भेट भएको थिएन। दुबैले भेट्न चाहनुभएको थियो, 'उहाँले भन्नुभयो,'मैले त्यसको संयोजन गरेको हो। राजेशदाइले अध्यक्षसँग केही राजनीति र केही सिने क्षेत्रका कुरा गर्नुभयो।’
प्रचण्ड र हमालबीच २० मिनेट एक्लाएक्लै कुराकानीसमेत भएको थियो।
देशमा राजनीतिक परिवर्तन भएको र जनतामा चेतनाको स्तर बढेको भन्दै राजनीतिक र सामाजिक आन्दोलनमा प्रचण्डले खेलेको भूमिकाको हमालले प्रशंसा गर्नुभएको थियो ।
अहिलेको परिवर्तनलाई संस्थागत गर्दै समृद्धि ल्याउन भने बाँकी नै रहेको उल्लेख गर्दै हमालले जनताले अपेक्षा गरे अनुसारको विकास नपाएको बताउनुभएको छ ।
हमालले प्रचण्डसँग राष्ट्रले सम्झिए आफू सेवा गर्न तयार रहेको बताउनुभयो । तत्काल राजनीतिमा आउने सोच नरहे पनि आउँदै आउँदिनँ भन्ने पक्षमा पनि आफू नरहेको हमालले बताएको सापकोटाले उल्लेख गर्नुभयो ।
नेपाललाई विदेशी चलचित्रको सुटिङका लागि हब बनाउन सकिने भन्दै त्यसका लागि नेपाली कला संस्कृति अनि प्राकृतिक दृश्यलाई विश्वमा चिनाउन जरुरी रहेको हमालले बताउनुभएको थियो ।
जवाफमा प्रचण्डले हमाललाई आफूले बौद्धिक अनि अध्ययनशील कलाकारको रूपमा बुझेको बताएको सापकोटाले जानकारी दिनुभयो ।
