काठमाडौं । सोमबारदेखि वायुसेवा कम्पनीका विमानहरूको उडान अनुमतिपत्र अनुसार नै रात्रिकालीन पार्किङ (बिसान) थालेका छन् ।
नेपाल नागरिक उड्डयन प्राधिकरणले उडान सुरक्षालाई थप सुदृढीकरण गर्ने भन्दै ७ असारदेखि आन्तरिक उडान गर्ने हेलिकप्टर र विमानलाई उडान अनुमतिपत्रले तोकेको विमानस्थलमै राख्नुपर्ने गरी सर्कुलर जारी गरेको थियो ।
त्यसैअनुसार सोमबार साँझबाट विभिन्न वायुसेवा कम्पनीका विमानले धनगढी, नेपालगञ्ज, विराटनगर लगायतका विमानस्थलमा रात्रिकालीन बिसान गरेका छन् । उनीहरूले सोही विमानस्थलबाट पहिलो उडान पनि भरेका छन् ।
दुई दिनको समय दिएर धेरै वायुयानलाई उपत्यकाबाहिर रात्रि बिसान गर्न जानुपर्ने व्यवस्था गरेपछि वायुसेवा सञ्चालकहरू आन्दोलित भएका थिए । तर, नेपाल वायुसेवा सञ्चालक संघसँग प्राधिकरणले संवाद गरेर निर्णय कार्यान्वयन गर्ने बाटो खोलेको थियो ।
प्राधिकरणका सूचना अधिकारी तथा उडान अनुमति शाखाका उपप्रवन्धक ज्ञानेन्द्र भुलका अनुसार मोफसलमा रात्रि बिसान गर्नुपर्ने करिब ९० प्रतिशत विमानहरूले सोमबार काठमाडौं छाडेको बताउनुभएको छ । प्राविधिक कारणबाहेकको अवस्थामा अब तोकिएकै विमानस्थलमा विमानहरू रात्रि बिसानमा जाने उहाँले बताउनुभयो ।
उहाँका अनुसार मंगलबार बिहान रात्रि बिसान गरेको विमानस्थलबाट भएको पहिलो उडानमा अधिकांश वायुयानले ‘फूल अकुपेन्सी’ पाएका छन् ।
प्राधिकरणका अनुसार त्रिभुवन विमानस्थलको पार्किङ क्षमता १७ वटा जहाजका लागि हो । तर अहिलेसम्म ५२ वटा जहाज पार्किङ गरिरहेका थिए ।
आन्तरिक वायुसेवा कम्पनीले काठमाडौं केन्द्रित उडान गर्दा होल्ड, डिलेदेखि टर्मिनल भवनमा भिडभाड भएको जस्ता समस्या देखिएको थियो । यसलाई समाधान गर्न भदै प्राधिकरणले ११ वैशाख २०७९ मा अध्ययन कार्यदल बनाएको थियो ।
