काठमाडौं । नेकपा एमालेका स्थायी कमिटी सदस्य घनश्याम भुसाले आफूविरूद्ध ’बदला भाव’ राखेर अहिले अनुशासनको कारबाही गर्न खोजिएको बताउनुभएको छ ।
नेकपा एमालेको अनुशासन आयोगले पार्टी अध्यक्ष केपी शर्मा ओलीको आलोचना गरेकोमा भुसाललाई कारबाही गर्न पार्टी सचिवालयलाई सिफारिस गरेको थियो ।
उहाँले आफूविरूद्ध पार्टीको आठौं महाधिवेशनदेखि नै बदला भाव राखिँदै आएको बताउनुभएको छ ।
उहाँले अनुशासनको कारबाही गर्न खोजिए पनि पार्टीभित्र आफू एक्लो नरहेको दाबी गर्नुभयो ।
यद्यपि पार्टीमा आफ्नो पक्षमा रहेका नेताहरू बोल्न नसकेको उहाँले बताउनुभयो । उहाँले आफूलाई पार्टीले अनुशासनको कारबाही गर्न लागेको विषयमा औपचारिक जानकारी नभएको बताउनुभयो ।
उहाँले पार्टीको पछिल्लो महाधिवेशन पछि बनेको कमिटी र प्रणालीका कारण पनि आफूलाई कारबाहीको विषय नौलो नलागेको बताउनुभएको छ ।
भुसालले आफूले पार्टीले हिँडेको बाटोबारे समीक्षा खोजेको समेत बताउनुभयो । उहाँले पार्टीले पछिल्लो पटक हिँडेको बाटो असफल भएको दाबी गर्नुभएको छ ।
उनले पार्टीमा आफूले सधैँ दलाल पुँजीवादको विषय उठाउँदै आएको र पार्टीका यथास्थितिवादीहरूलाई मन नपरेको उल्लेख गर्नुभयो ।
उहाँले आफूले सार्वजनिक सञ्चारमाध्यममा बोलेको कुराको बचाउ गर्नुभएको छ ।
