काठमाडौँ । विदेशबाट सुपारी आयातको इजाजत रोक्न सरकारलाई संसदीय समितिले निर्देशन दिएको छ । प्रतिनिधि सभाको उद्योग तथा वाणिज्य र श्रम तथा उपभोक्ता हित समितिले सुपारी आयात इजाजतपत्र नदिन उद्योग, वाणिज्य तथा आपूर्ति मन्त्रालयलाई निर्देशन दिएको हो ।

समितिको बुधबार(आज)को बैठकपछि सभापति विमलप्रसाद श्रीवास्तवले सुपारी आयातमा रोक लगाउन निर्देशन दिएका हुन् । विदेशी मुद्राको सञ्चिती कम रहेको अवस्थामा सुपारीजस्ता वस्तु आयातमा रोक लगाउनुपर्ने उनको भनाइ थियो ।

सभापति श्रीवास्तवले समितिले आयात खुला गराइएका उद्योगमाथि अनुगमन गर्ने भन्दै अनुगमनको निष्कर्ष ननिस्किएसम्म आयात सिफारिस रोक्न निर्देशन दिएका हुन् ।

समितिमा उद्योग, वाणिज्य तथा आपूर्ति मन्त्रालयका सचिव अर्जुन पोखरेल र गणेश पाण्डे सहभागी छन् ।