काठमाडौँ । नेकपा एकीकृत समाजवादी पार्टीका अध्यक्ष माधवकुमार नेपालले नेपालमा अब राजतन्त्र फर्किने कुनै सम्भावना नभएको बताएका छन् । बरु पार्टी खोल्न वा व्यापारमा लाग्न पूर्व राजा ज्ञानेन्द्र शाहलाई सुझाव दिएका छन् ।

शुक्रबार(आज) नेपाली कांग्रेसको १४औं महाधिवेशनको उद्घाटन समारोहलाई सम्बोधन गर्दै नेपालले १६ वर्ष पहिले दलहरु लोकतन्त्रको रक्षाका लागि गणतन्त्रबाहेक अरु उपाय छैन भन्ने निष्कर्षमा पुगेको सम्झिए । तर अहिले कालो बादल मडारिन खोजेको भन्दै उनले भने, ‘प्रतिगमी तत्वहरुलाई भन्न चाहन्छु, फेरि शिर उठाउने दुस्साहस नगर्नुस् । अब नदीको प्रवाह अगाडि बढिसकेको छ ।’

नेपालमा राजतन्त्रको कुनै भविष्य नभएको भन्दै उनले दुस्साहस नगर्न आग्रह गरे । उनले अघि भने, ‘राम्रो के हुन्छ भने राजाले पार्टी खोले हुन्छ, होइन भने व्यापार गरेर बसे हुन्छ । तर एउटा वंशको शासन हामीलाई स्वीकार छैन ।’

उनले राजनीतिमा मैमत्त हुने एक अर्कालाई सम्मान नगर्ने प्रवृत्ति हुर्किएको बताए । ‘विकृतिहरूलाई हामीले पन्छाउनुपर्छ । नेपालको राजनीतिमा मैमत्त हुने, सम्मान नगर्न प्रवृत्ति छ’, उनले भने । अध्यक्ष नेपालले धेरै गफ गरेको तर त्यसअनुसार काम गर्न नसकेको पनि बताए । ‘हामीले गफ धेरै गरेका छौं, काम कम गरेका छौं । जनताका गुनासाहरू के छन् ? जनता किन विरक्तिँदैछन् ? यसको छानबिन अध्ययन गरेर अघि बढ्न सक्यौं भने नेपालको विकासको विशाल सम्भावना छ’, उनले भने ।

साँचो अर्थमा लोकतन्त्र चाहने हो भने लोकतन्त्रका मूल्य र मान्यता आत्मसात गर्नुपर्ने उनले बताए ।