काठमाडौं - पेरुलाई हराउँदै कोलम्बिया कोपा अमेरिका फुटबलमा तेस्रो बनेको छ । भर्खरै सम्पन्न खेलमा पेरुलाई ३–२ गोल अन्तरले हराउँदै कोलम्बियाले तेस्रो स्थान हासिल गरेको छ ।

खेलको अन्तिम समयमा गोल गर्दै कोलम्बियाले पेरुमाथि रोमाञ्चक जित सनसनीपूर्ण जित निकाल्दै तेस्रो बनेको हो ।

पहिलो हाफको अतिरिक्त समयमा योसिमार योटुनको गोलमा पेरुले अग्रता बनाएको थियो । दोस्रो हाफ सुरु हुने बित्तिकै चौथो मिनेटमा जुआन क्वारड्राडोले खेल बराबरीमा ल्याएका थिए ।

त्यस्तै, लुइस डियाजले ६६ औं मिनेटमा गोल गर्दै कोलम्बियालाई २–१ को अग्रता दिलाएका थिए । खेल सकिन आठ मिनेटअघि जियानलुका लापादुलाले खेल बराबरीमा ल्याएका थिए ।

दोस्रो हाफको इन्जुरी समयमा डियाजले व्यक्तिगत दोस्रो गोल गर्दै कोलम्बियालाई जित दिलाउँदै तेस्रो बनाए ।

ब्राजिलमा जारी प्रतियोगितामा कोलम्बिया र पेरु सेमिफाइनलमा क्रमशः अर्जेन्टिना र ब्राजिलसँग पराजित भएका थिए ।

कोपा अमेरिकाको उपाधिका लागि आइतबार बिहान अर्जेन्टिना र ब्राजिल भिड्दैछन् । खेल नेपाली समयअनुसार बिहान ५ः४५ बजे हुनेछ ।