काठमाडौं – युरोपियन च्याम्पियनसिप (युरोकप) फुटबलअन्तर्गत सेमिफाइनलका खेलहरु आज रातिदेखि सुरु हुँदै छन् ।

युरोकपको पहिलो सेमिफाइनल खेलमा आज मध्यराति १२ः४५ बजे इटाली र स्पेन भिड्दैछन्।

लण्डनको वेम्बली स्टेडियममा हुने खेलमा इटाली र स्पेन दुवै टोली बदलाको भावनामा हुनेछन् । किनकि, स्पेन इटालीसँग सन् २०१६ को युरोकपको अन्तिम १६ मा ब्यहोरेको हारको बदला इटालीसँग लिन चाहन्छ । फ्रान्समा भएको उक्त प्रतियोगितामा दाबेदार मानिएको स्पेन इटालीसँग २–० ले पारजित भएको थियो ।

त्यस्तै, इटालीमा पनि स्पेनसँग आज राति उस्तै बदलाको भाव हुनेछ । किनकि, सन् २०१२ को फाइनलमा इटाली स्पेनसँग ४–० को लज्जास्पद पराजय भोग्न बाध्य भएको थियो । त्यसैगरी, सन् २००८ को क्वार्टरफाइनलमा पनि इटाली स्पेनसँग पेनाल्टी सुटआउटमा हारेको थियो । यसर्थ, आजको खेलमा दुवै बदलाको भावना राखेर मैदानमा उत्रने फुटबल पण्डितहरुले आँकलन गरेका छन् । दुवै टोलीका प्रशिक्षकले पनि यसको संकेत गरिसकेका छन् ।

‘हेड टु हेड’लाई हेर्ने हो भने इटालीभन्दा स्पेन बलियो देखिएको छ ।

विश्व फुटबलका चिरपरिचित प्रतिद्वन्द्वी यी टोलीबीच अहिलेसम्म ३३ पटक भेट भएको छ ।

यी भेटमा स्पेनले १२ खेलमा जित निकालेको छ भने इटालीले ९ खेल आफ्नो पक्षमा पारेको छ । १२ खेल बराबरीमा टुंगिएको छ ।

आजको विजेता टोलीले बुधबार राति हुने इंग्ल्याण्ड र डेनमार्कबीचको खेलको विजेतासँग फाइनल भिडन्त गर्नेछ ।