एजेन्सी - कोपा अमेरिका फुटबल प्रतियोगिताअन्तर्गत समूह चरणको अन्तिम खेलमा आयोजकसमेत रहेको उपाधि दाबेदार ब्राजिलले बराबरी खेलेको छ ।

आज बिहान भएको खेलमा ब्राजिलले इक्वेडरसँग १–१ गोलको बराबरी खेलेको हो ।

सुरुवाती अग्रता जोगाउन नसक्दा ब्राजिल बराबरीमा रोकिएको हो ।

खेलको ३७ औं मिनेटमा इडर मिलिटाओले गोल गर्दै ब्राजिललाई अग्रता दिलाएका थिए । एभर्टनको फ्रिकिकमा उनले हेडमार्फत गोल गरेका थिए ।

तर, खेलको ५३ औं मिनेटमा एन्जल मिनाले गोल गर्दै इक्वेडरलाई १–१ गोलको बराबरीमा ल्याए । उनले इनर भ्यालेन्सियाको पासलाई सदुपयोग गरेका थिए ।

यस बराबरीसँगै समूह ’बी’ को ब्राजिल समूह विजेता बन्दै क्वार्टरफाइनलमा प्रवेश गरेको छ । समूह चरणमा अपराजित ब्राजिलले ४ खेलमा १० अंक जोड्यो ।

इक्वेडरले ४ खेलमा ३ अंक जोड्यो । इक्वेडर पनि चौंथो स्थानमा रहदै क्वार्टरफाइनलमा पुगेको छ ।

त्यस्तै, आज बिहान नै भएको समूह चरणको अन्तिम खेलमा भेनेजुएलालाई १–० ले पराजित गर्दै पेरु अन्तिम आठमा पुगेको हो ।

पेरुको जितमा आन्द्रे कारिल्लोले निर्णायक गोल गरे । उनले खेलको ४८ औं मिनेटमा गोल गरेका हुन् ।

यस जितसँगै पेरु समूह ’बी’ को उपविजेता बन्दै क्वाटरफाइनलमा पुगेको हो ।

पेरुले ४ खेलमा ७ अंक जोड्यो ।

भेनेजुएला भने समूह चरणबाटै बाहिरिएको छ । २ अंक जोडेको भेनेजुएला पुछारमा रह्यो ।