काठमाडौं – ब्राजिलमा जारी ४७ औँ कोपा अमेरिका फुटबलअन्तर्गत मंगलबार बिहान समूह एका दुईवटा खेल हुँदैछन् । पहिले खेल नेपाली समयअनुसार मध्यराति २ः४५ बजे उरुग्वे र चिलीबीच हुँदैछ । त्यस्तै, दोस्रो खेल अर्जेन्टिना र पाराग्वेबीच बिहान ५ः४५ बजे हुँदैछ ।

जारी प्रतियोगितामा अर्जेन्टिना अपराजित छ । उसले दुई खेल खेलेको छ जसमा एक खेल जितेको छ भने एक खेल बराबरी खेलेको छ ।

अर्जेन्टिनाले पहिलो खेल चिलीसँग खेलेको थियो । सो खेल १–१ को बराबरीमा टुंगिएको थियो । अर्जेन्टिनाका लागि कप्तान लियोनल मेसीले फ्रिकिकमार्फत गोल गरेका थिए ।

दोस्रो खेलमा भने अर्जेन्टिनाले उरुग्वेलाई १–० ले हराएको थियो ।

मंगलबार बिहान पाराग्वेविरुद्ध जित निकालेमा अर्जेन्टिना दोस्रो चरणमा जानेछ ।

अर्जेन्टिनाका प्रशिक्षक लियोनल स्कालोनीले पनि आफ्नो टोली शतप्रतिशत् नतिजाका लागि खेल्ने बताएका छन् । खेल जित्दै आफ्नो टोली दोस्रो चरणमा जाने उनको दाबी छ ।

यता, कोपा अमेरिका सर्वाधिक १५ पटक जितेको उरुग्वे भने पहिलो जितको खोजीमा छ । चिलीविरुद्ध सुखद नतिजा ल्याउँदै दोस्रो चरणमा जाने सम्भावना बलियो बनाउँदै जाने दाउमा उ हुनेछ ।

प्रशिक्षक ओस्कार टाबरेजले पनि आफ्नो टोली शतप्रतिशत् जित निकाल्ने दबाबमा रहेको बताएका छन् ।

समूह एमा चिली पहिलो, अर्जेन्टिना दोस्रो र पारग्वे तेस्रो स्थानमा छन् ।

अर्जेन्टिना र चिलीको समान ४–४ अंक छ भने पाराग्वेको ३ अंक छ ।

उरुग्वे र बोलिभियाले भने हालसम्म खाता खोल्न सकेका छैनन् ।

प्रतियोगितामा सहभागी १० टोलीलाई दुई समूहमा बाँडिएको छ । प्रत्येक समूहबाट शीर्ष स्थानमा रहेका चार टोली दोस्रो चरणमा जानेछन् ।
हालसम्म आयोजक ब्राजिल मात्र दोस्रो चरणमा पुगेको छ । ब्राजिल समूह बीमा छ ।