काठमाडौं । प्रधानमन्त्री पुष्पकमल दाहाल प्रचण्डले सरकारमाथि चौतर्फी प्रहार भइरहेको बताइरहँदा प्रमुख प्रतिपक्षी दल नेकपा एमाले पनि खुलेआम सरकार ढाल्ने रणनीति लिएर उभिएको छ । एमाले अध्यक्ष केपी शर्मा ओलीले समेत सरकारका विरुद्ध जुनसुकै बेला हडताल गर्नुपर्ने भन्दै तयार रहन पार्टीपंक्तिमा निर्देशन गरिसक्नुभएको छ । उता, नेकपा एकीकृत समाजवादीका सम्मानित नेता झलनाथ खनालपनि यो गठबन्धनबाट मुलुक पार नलाग्ने अभिव्यक्ति दिँदै आउनुभएको छ । सरकारले जनतालाई राम्रो डेलिभरी दिन नसकेको आवाज उठिरहेका बेला नेकपा माओवादी केन्द्रका नेता हिमाल शर्मा भने एमालेले प्रतिपक्षीमा बस्नुपरेको पीडा उछालिरहेको बताउनुहुन्छ । आजको दिनमा सरकार ढाल्ने कुनै कारण नभएको उहाँको दाबी छ ।
मुलुकमा संघीयता आइसकेपछि बनेका सरकार दुई वा दुई भन्दा बढी दल मिल्नुको विकल्पमा छैनन् । राजनीतिक रुपमा बाँझिने महत्त्वाकाङ्क्षाका कारण पनि सरकार स्थिर बन्न सकेको छैन । अहिले बनेको गठबन्धनमा पनि विभिन्न महत्त्वाकाङ्क्षा बोकेका दलहरूको हाबी रहेको छ । नेकपा एकीकृत समाजवादीकी सचिव रामकुमारी झाँक्रीका अनुसार प्रधानमन्त्रीले मन्त्रीहरूको क्षमताका आधारमा मूल्यांकन भइरहेको बताइरहँदा क्याबिनेटमा फेरबदल भएपनि गठबन्धनमा परिवर्तन हुने सम्भावना कम छ । कुनै व्यक्तिले आवेगमा आएर बोलेको कुराले सिंगो तालमेल नभत्किने उहाँको विश्वास छ ।
नेकपा एमाले कुनैपनि हालतमा यो गठबन्धनलाई भत्काएर नयाँ समीकरण गर्ने दाउमा जुटेको छ । यद्यपि एमालेका लागि त्यो अवस्था सहज भइसकेको छैन । एमाले सचेतक महेश बर्तौलाले यो गठबन्धन चारकिल्ला बाहिरबाट बनेकोले भत्काउन आवश्यक रहेको दाबी गर्नुभएको छ ।
नेपालमा लामो समयसम्म स्थिर सरकार नरहने रोग नै हो । विभिन्न कारण देखाएर सरकार ढाल्ने र अर्को समीकरण निर्माण हुने चलन व्याप्त नै रहिआएको छ । जसका कारण देशी विदेशी तत्त्वले चलखेल गर्न पाइरहेका छन् । मुलुकको विकास र समृद्धिका लागि त राष्ट्रिय एकताको नै खाँचो रहेको छ ।
