काठमाडौं । रोजगारीका लागि कोरिया जान भाषा परीक्षामा सहभागी हुन पाउनुपर्ने माग राख्दै आन्दोलित बनेका परीक्षार्थीहरूमाथि राज्यले दमन गर्दा दुईजनाको ज्यान गएको छ भने कैयौँ घाइते भएका छन् । ललितपुरको बालकुमारीमा जम्मा भएका परीक्षार्थीहरूको माग थियो धन कमाउन र गरिबी हटाउन कोरिया जान पाउँ । अर्को माग थियो, हामीले पठाएको रेमिट्यान्सले देश चल्न सकोस् । तर, यहाँका कन्सल्टेन्सीहरूलाई पाल्नका निम्ति कुनै एक क्षेत्रमा परीक्षा दिएकाहरूलाई अर्को क्षेत्रमा एक वर्षसम्म परीक्षा दिन नपाउने नियमका कारण विद्यार्थीहरू आन्दोलित बन्नुपर्यो ।
विश्वका १६ देशहरूबाट कोरिया जान्छन्, तर १५ देशमा नेपालको जस्तो नियम छैन । नेपालमा मात्रै गलत अभ्यास भइरहेको बताउँदै सामाजिक अभियन्ता एवं मेडिकल व्यवसायी दुर्गा प्रसाईंले नागरिकहरूले कमाउन जान्छु भन्दा पनि राज्य दुस्मन बनेको बताउनुभयो ।
वरिष्ठ अधिवक्ता बालकृष्ण न्यौपाने र परराष्ट्रविद् हेमराज कार्कीका अनुसार राज्यले संवेदनाहीन व्यवहार प्रस्तुत गरेको बताउनुभयो । दुईजना मान्छेको हत्या भएपछि नियम परिवर्तन हुने अवस्था आएको न्यौपानेको भनाइ थियो । परराष्ट्रविद् कार्कीले नेपालको गरिबी विश्वमाझ एकपटक पुनः झल्किएको बताउनुभयो ।
माओवादी केन्द्रका सांसद लेखनाथ दाहाल राजनले अराजक भिडलाई नियन्त्रणमा लिन गोली प्रहार गरिएको दाबी गर्नुभयो । मन्त्री र पिएसओको सुरक्षाका लागि पनि प्रहरी बाध्यतामा परेको हुनसक्ने बताउँदै उहाँले छानबिनपछि यथार्थ बाहिर आउने आशा व्यक्त गर्नुभयो ।
नेपाल प्रहरीका पूर्व डिआइजी हेमन्त मल्लका अनुसार प्रहरी पनि संवेदनशील हुन नसक्दा घटना भएको देखिन्छ । यता, राजनीतिक विश्लेषक जैनेन्द्र जीवनले देशको दूरदराजबाट आएका नागरिकमाथि राज्यको निरीह कदमले सबैलाई स्तब्ध तुल्याएको बताउनुभयो ।
श्रम मन्त्रालयअन्तर्गतको इपिएस शाखाले गत साउन २० देखि कोरियाको पानीजहाज निर्माण क्षेत्रमा काम गर्न जान चाहने श्रमिकका लागि भाषा परीक्षाको आवेदन खुलाएको थियो । अनलाइन तथा अफलाइन माध्यमबाट ३३ हजार दुई सय एक पुरुष र दुई हजार दुई सय ७७ महिला गरी ३५ हजार चार सय ७८ जनाले आवेदन दिए । एचआरडी सर्भिस अफ कोरियाले गत असोजदेखि मंसिरसम्म लिएको पहिलो चरणको भाषा परीक्षामा ३२ हजार पाँच सय सात परीक्षार्थी सहभागी भए । उत्तीर्ण भने चार हजार ९८ मात्रै भए ।
जहाज निर्माण क्षेत्रमा जाने श्रमिकको परीक्षा समाप्त भएपछि इपिएस शाखाले गत २ पुसदेखि कोरियाको उत्पादन क्षेत्रको कामका लागि आवेदन खुलायो । तर, पानीजहाज निर्माण क्षेत्रमा परीक्षा दिएर अनुत्तीर्ण भएका युवाले भने आवेदन दिन नपाइने सूचना जारी ग¥यो । यही विषयमा विवाद चर्किँदा दुई युवाको ज्यान गएको हो ।
