काठमाडौं । विभिन्न चलचित्र, टेलिचलचित्र, सांगीतिक भिडियो, टिकटकलगायत टेलिभिजन तथा स्टेज कार्यक्रममा आफ्ना पोसाकहरूको दुरुपयोग भइरहेको भन्दै नेपाल प्रहरीले सचेत गराएको छ ।

प्रधान कार्यालयले आज सूचना प्रकाशित गरी अनधिकृत रुपमा प्रहरीको पोसाक दुरुपयोग गर्नेहरुमाथि कारबाही गर्ने चेतावनी दिएको छ ।

प्रहरी पोसाकको प्रयोग गर्नुपूर्व प्रहरी प्रधान कार्यालय नक्साल स्थित जनसम्पर्क तथा प्रचार प्रसार इकाईमा पोसाकको प्रयोग गर्नुको प्रयोजन खुलाइ स्वीकृति लिनुपर्ने प्रावधान रहेको जानकारीसमेत गराएको छ ।

‘स्वीकृति नलिइ कुनै पनि प्रयोजनका लागि नेपाल प्रहरीले प्रयोग गर्ने पोसाक र पोसाकमा प्रयोग हुने दर्ज्यानी चिन्ह, प्रहरीको मोनोग्राम प्रयोग नगर्न, नगराउन हुनसमेत जानकारी गराइएको छ’, विज्ञप्तिमा भनिएको छ ।