काठमाडौं । भ्रष्टाचारविरुद्ध सरकारले चालेको अभियानलाई शंकाको रुपमा हेर्न थालिएका बेला यो ब्याटल जितेरै छोड्ने प्रधानमन्त्री पुष्पकमल दाहाल प्रचण्डको अड्डी लिनुभएको छ । मुलुकमा हरेक समय भएका भ्रष्टाचार काण्डहरूको निरूपण गरेरै छोड्ने उहाँको प्रतिबद्धता रहेको छ । काठमाडौंमा आज आयोजित कार्यक्रममा प्रचण्डले ग्राउण्डबाट समर्थन भएपछि मात्रै ब्याटल जित्न सकिने बताउनुभएको छ । भ्रष्टाचार विरोधी, राज्यको सम्पत्ति व्यक्तिले दोहन गर्ने बेथितिविरुद्ध र तस्करीका विरुद्धका प्रयास छेडिएको प्रचण्डको दाबी छ । राष्ट्रको एकता र समाजवाद निर्माणको लागि यो लडाई जित्नैपर्ने उहाँको तर्क छ ।
नक्कली भुटानी शरणार्थी प्रकरणबाट शुरु गरिएको भ्रष्टाचारविरुद्धको अभियानपछि धेरै काण्डहरू बाहिरिएका छन् । ‘लहरो तान्दा पहरो’ भएको आक्षेप खेपिरहेका बेला सरकारलाई यो चुनौती पार गर्न कठिन देखिन्छ । भ्रष्टाचार, बेथिति, अनियमिततामा आफ्नै वरिपरिका मानिसहरूतिर सुई घुमिरहेको अवस्थामा सरकार थप दबाबमा परेको आंकलन गर्न थालिएको छ । कांग्रेसले केन्द्रीय सदस्यबाट बालकृष्ण खाँणलाई निलम्बन गर्न नसक्नु र नाम पोलिएका व्यक्तिहरू सोधपुछको दायरामा पनि नआउनु यसका ज्वलन्त उदाहरण हुन् । प्रधानमन्त्री प्रचण्डले भने भ्रष्टाचारविरुद्धको अभियानमा सरकार लागेकाले समाजवादी मोर्चामा फाटो ल्याउन र सरकार ढाल्ने प्रपञ्च रचिएको आरोप लगाउनुभयो ।
नेपाली कांग्रेसका सांसद प्रदीप पौडेलले सरकार भ्रष्टाचारविरुद्ध लागिरहेका बेला विमानस्थलबाट सयौँ क्विन्टल सुन भित्रिनु रहस्यमय भएको बताउनुभयो । विमानस्थलबाट कसैले थाहा नपाउने गरी सुन भित्रिनु संवेदनशील भएको बताउँदै उहाँले जुनसुकै हालतमा छानबिन हुनुपर्ने जिकिर गर्नुभयो । सरकारकै संरक्षणमा यी गतिविधि भइरहेको तर्फ इंगित गर्दै पौडेलले अर्थमन्त्री र गृहमन्त्रीको राजीनामा माग्ने दिन आउन सक्ने दाबी गर्नुभयो ।
प्रमुख प्रतिपक्षी दल नेकपा एमालेले भने सरकारले भ्रष्टाचारविरुद्धको अभियानका नाममा स्टण्टबाजी गरिरहेको आरोप लगाएको छ । एमाले सांसद ठाकुर गैरेले सरकारको संरक्षणले सुन भित्रिएको दाबी गर्नुभयो । तस्करलाई संरक्षण गर्दै अकुत सम्पत्ति कमाउन सरकारका पदाधिकारीहरू लागेको उहाँको आरोप छ ।
भ्रष्टाचारमा शून्य सहनशीलता अपनाउनु राज्यलाई समृद्धको दिशामा उन्मुख गराउनु हो तर, त्यसको कार्यान्वयनका लागि के कस्ता प्रयास भइरहेका छन्, गतिविधि कस्ता छन् त्यो प्रधान विषय हो । पछिल्लो समय सरकारका गतिविधि हेर्दा र बढ्दो तस्करीले शंका गर्ने धेरै पाटाहरू जन्माएको छ । सरकारले आफू साँच्चै भ्रष्टाचार विरोधी अभियानमा लागेको प्रमाणित गर्न निकै सकस देखिन्छ ।
