काठमाडौं । जागिर गुमाएर र तलब नपाएका विभिन्न सञ्चारमाध्यमका श्रमजीवी पत्रकार तथा कर्मचारीहरूले बिहीबारदेखि चरणबद्ध निर्णायक संघर्ष गर्ने घोषणा गरेका छन् । संघर्षका कार्यक्रमअन्तर्गत कार्यालय घेराउ, रिले अनशन तथा विभिन्न निकायहरुमा ज्ञापनपत्र बुझाउने कार्यक्रम रहेको संयुक्त संघर्ष समितिले जनाएको छ ।

कोरोना भाइरस महामारीको निहुँ पारेर केही सञ्चारमाध्यमले पत्रकार तथा कर्मचारीहरुलाई जागिरबाट निकाल्ने, बेतलबी विदा दिने तथा तलब नै नदिने जस्ता अन्याय र शोषण गरेको भन्दै उनीहरु आन्दोलनमा लागिरेहका छन् । त्यसका लागि उनीहरुले संघर्ष समितिसमेत बनाएका छन् ।

श्रमजीवीहरुले कानुनअनुरूप उठाएका मुद्धा र राखेका माग शत्प्रतिशत सम्बोधन नभएसम्म आन्दोलन नरोकिने समितिका संयोजक धर्मेन्द्र कर्णले बताउनुभयो ।

‘साथै, मिडिया हाउसमा अन्याय एवं श्रमशोषणमा परेका सम्पूर्ण श्रमजीवीलाई सम्पर्कमा आउन र आन्दोलनमा सहभागी हुनसमेत आग्रह गर्दछु’, उहाँले जारी गरेको विज्ञप्तिमा उल्लेख छ ।