काठमाडौं – त्रिकोणात्मक टी–ट्वान्टी अन्तर्राष्ट्रिय सिरिजमा मलेसियाले विजयी सुरुआत गरेको छ । मंगलबार भएको खेलमा मलेसियाले पपुवा न्युगिनी (पीएनजी) लाई ८ रनले पराजित गरेको हो ।

त्रिवि क्रिकेट मैदानमा मलेसियाले दिएको १ सय ८१ रनको लक्ष्य पछ्याएको पीएनजीले १९ ओभर ३ बलमा अलआउट हुँदै १ सय ७२ रन बनायो । ​पीएनजीका लागि टोनी उराले ५६ रनको अर्धशतकीय पारी खेले । यस्तै नोर्मान भानुवाले ४५ रन बनाए ।

बलिङतर्फ मलेसियाका लागि शर्भिन मुनियाण्डीले चार विकेट लिए । यस्तै मुहमद वाफिक र विरन्दिप सिंहले तीन÷तीन विकेट लिए । यसअघि टस जितेर पहिले ब्याटिङ गरेको मलेसियाले २० ओभरमा ३ विकेट गुमाएर १ सय ८० रन बनाएको थियो । मलेसियाका लागि कप्तान अहमद फाईज र विरन्दिप सिंहले अर्धशतकीय पारी खेले ।

मलेसियाका विरन्दिपले अविजित रहदै ५९ रन बनाए । त्यस्तै अहमद ५६ रनमा आउट भए । यस्तै साएद अजिज ४७ रनमा आउट भए ।​ बलिङतर्फ पीएनजीका लागि नोर्मन भानुवाले २ विकेट लिए । त्यस्तै नोसेन पोकानाले १ विकेट लिए ।

मलेसियाले जितसँगै एक खेलबाट २ अङ्क जोड्यो । यता पीएनजीले भने लगातार दोस्रो हार बेहोरेको छ । पहिलो खेलमा पीएनजी नेपालसँग १५ रनले पराजित भएको थियो ।