काठमाडौं । नेपाली राष्ट्रिय टोलीको गोलकिपर प्रशिक्षकमा विकास मल्ल नियुक्त भएका छन् । अखिल नेपाल फुटबल संघ (एन्फा) ले राष्ट्रिय पुरुष फुटबल टोलीको गोलकिपर प्रशिक्षकमा विकास मल्ललाई नियुक्त गरेको हो । राष्ट्रिय टोली गोलकिपर प्रशिक्षकविहीन बनेपछि एन्फाले मल्ललाई नियुक्त गरेको जनाएको छ । मल्लले अब भदौ १ बाट सुरु हुने राष्ट्रिय टोलीको बन्द प्रशिक्षणमा गोलकिपर प्रशिक्षकको जिम्मा सम्हाल्नेछन् ।

नेपाल फिफा विश्वकप २०२२ एएफसी एसियन कप २०२३ को संयुक्त छनोटको तयारीमा जुटेपछि एन्फाले गोलकिपर प्रशिक्षकका लागि मल्लालाई नियुक्त गरेको हो । हाल क्वारेन्टिनमा रहेको नेपाली टोलीले भदौ १ बाट प्रशिक्षण सुरु गर्ने तयारी थालेको छ । मल्ल राष्ट्रिय फुटबल टोलीका पूर्वगोलकिपर समेत हुन् ।