काठमाडौं । काठमाडौको नागार्जुन नगरपालिकामा रहेको इलेन मेमोरियल स्कुलले विभिन्न विद्यालयका प्रधानाध्यापक एवं सह प्रधानाध्यापकहरुलाई नेतृत्व क्षमता विकास तालिम दिएको छ । तालिममा देशभरका ७७ वटै जिल्लाका ४७८ जनाको सहभागिता रहेको इलेन स्कुलका प्राध्यानाध्यापक जयराम चापागाइले जानकारी दिनुभयो ।

प्रधानाध्यापकमा असल, व्यवहारिक र प्रभावकारी नेतृत्व सिप र योजना निर्माण तथा कार्यान्वयन कुशलता आवश्यक पर्ने हुनाले प्रशिक्षण कार्यक्रम आयोजना गरिएको उहाँले बताउनुभयो ।

आन्तरिक तथा बाह्य स्रोत पहिचान गरी विद्यालयमा उपलब्ध सबै किसिमका स्रोत र समुदायको विविधताको उपयोग गर्ने, विद्यालयलाई सबैको साझा र अपनत्वभावको स्थल बनाउने, आकर्षक र सुरक्षित तुल्याउने, विविध भाषा, संस्कृति, मूल्य मान्यता र स्थानीय विशेषताको संरक्षण गर्ने विषयमा पनि प्रशिक्षण दिइएको उहाँको भनाई छ ।

प्रधानाध्यापकले विद्यालयका विद्यार्थी, शिक्षक, कर्मचारीहरु, अविभावक, समुदायका अगुवासँगै विभिन्न सङ्घ संस्था, सरोकारवाला निकायसँग गर्नु पर्ने समन्वय र सम्वन्धका बारेमा पनि छलफल भएको प्रधानाध्यापक चापागाईले जानकारी दिनुभयो ।

कार्यक्रमका सहजकर्ता लक्ष्मण श्रेष्ठले समुदायलाई विकास र समृद्धितर्पm उन्मुख गराउन पनि प्रधानाध्यापकहरुको महत्वपूर्ण भूमिकाको हुने भएकाले उनीहरुलाई नेतृत्व र क्षमता विकास तालिमको आयोजना गरिएको बताउनुभयो । कार्यक्रमका प्रशिक्षक तथा सहजकर्ता बोध कुमार खनालले प्रधानाध्यापकमा नेतृत्वको विकास, संस्थागत विकास र मानवीय उत्प्रेरणाका लागि अति आवश्यक गुणहरुका बारेमा छलफल गराउनु भएको थियो ।

शिक्षकहरुलार्य सधैँ विद्यार्थी, अभिभावक था समाजप्रति उत्तरदायी, जवाफदेही बनाएर आफ्नो कार्यप्रति लाग्नका लागि उचित वातावरण सिर्जना गर्नु गराउनु पर्ने कला र क्षमता पनि प्रधानाध्यापकमा हुनुपर्नेमा उहाँले जोड दिनुभएको थियो ।

मानवको चौतर्फि विकास र उन्नतिका लागि, मानवीय आवश्यकता परिपुर्तिका लागि विद्यालयहरू र विद्यालयका नेतृत्वदायी अंगहरुसँगै शिक्षकहरु नै महत्वपूर्ण हुने उदाहरणहरु प्रशिक्षक खनालले प्रस्तुत गर्नुभएको थियो । स्वागत मन्तव्य व्यक्त गर्दै इलेन मेमोरियल स्कुलका प्रिन्सिपल जयराम चाँपागाईले आफ्नो विद्यालय एक्काईसौं शताब्दी सुहाँउँदो शिक्षा, सिप, ज्ञान र चरित्र निर्माणका खातिर लागि परेको र आवश्यकताका आधारमा सरकारी सामुदायिक विद्यालयलाई अगाडि बढ्न सहकार्य गर्न तत्पर रहेको बताउनुभयो ।

वहाँले विद्यालयमा विज्ञान र व्यवस्थापनमा कक्षा ११ र १२ मा नेपालमै तुलनात्मक रुपमा कम शुल्कमा स्तरिय शिक्षा दिएको जानकारी दिनुभयो ।

विद्यालयका प्रमुख कार्यकारी प्रमुख सृजना रंंजितले कुनै पनि संघसस्था वा सङ्गठनलाई सफल र प्रभावकारी रूपमा सञ्चालन गर्न कुशल र सक्षम नेता र नेतृत्वको आवश्यकता पर्ने हुनाले इलेन स्कुलले सरकारी र संस्थागत विद्यालयका प्रधानाध्यापकहरु, सहायत प्रधानाध्यापकहरु र शिक्षकहरुलाई नेतृत्व क्षमता विकास तालिम आयोजना गरेको बताउनुभयो ।

उहाँले माइक्रोसफ्ट सर्टिफाईड नेपालको पहिलो स्कुल भएकोले पनि इलेन स्कुलले सुचना, संचार र विज्ञान तथा प्रविधिको यथोचित प्रयोग गरी नर्सरी देखि कक्षा १२ सम्मको शिक्षा उपलब्ध गराईरहेको जानकारी दिनुभयो ।

विद्यालयका विभागिय प्रमुख अभिशेक ज्ञवालीले सही व्यवस्थापन नहुँदा असल काम पनि प्रभावकारी नहुने भएकोले यस्तो प्रशिक्षणको खाँचो महसुस गरेर कार्यक्रमको आयोजना गरिएको स्पष्ट पार्नुभयो ।

उहाँले आगामी दिनमा शैक्षणिक प्रबन्ध, प्रशासन सुव्यवस्था, अनुसन्धान र विकास लगायत अन्य शैक्षिक विषयहरुमा पनि तालिम आयोजना गरिने जानकारी दिनुभयो । कार्यक्रममा सहभागी महेश्वर झाले कार्यक्रम अति प्रभावकारी र उपयोगी भएको बताउनुभयो भने अर्का सहभागी उत्तम बहादुर तामाङ्गले आगामी दिनमा विद्यालय विकास प्रस्ताव निर्माण कार्यक्रम गर्न सुझाव दिनुभयो ।

त्यसैगरी भर्चुअल शिक्षण सिकाई प्रकृया र सुविधा उपयोग, शैक्षिक सुचना प्रणालीका बारेमा तालिम कार्यशाला आयोजना गर्न पनि उहाँले अनुरोध गर्नुभयो ।

अर्का सहभागी मोचनाथ न्यौपानेले ईलेन मेमोरियल स्कुलले कोभिडका विरामीका लागि पोर्टेबल अक्सिजन कन्सन्ट्रेटर सापटी कार्यक्रम निःशुल्क रुपमा संचालन गरेको सुन्दा आफुलाई अत्यन्त खुशी लागेको र आगामी दिनमा पनि यस्तै सामाजिक दायित्व निर्वाहमा अब्बल भएको हेर्न चाहेको बताउनुभयो ।