काठमाडौं । कोरोना भाइरसको संक्रमण न्यूनीकरणका लागि घोषणा गरिएको लकडाउनका कारण विगत ४ महिनादेखि बन्द होटल तथा रेष्टुराँहरु आजबाट खुलेका छन् । सरकारले श्रावण १५ बाट होटलहरु खोल्न पाउने निर्णय गरेपछी आजबाट देशभरका होटलहरु खुलेका हुन् ।

होटल संघ नेपाल हानले स्वास्थ्यसम्बन्धी मापदण्डको पूर्ण पालना गरी होटलहरु सञ्चालनमा ल्याइएको जनाएको छ । आजैबाट पर्यटकीय नगरी पोखरा र चितवनको सौराहा होटलहरु पनि खुलेका छन् ।

पर्यटकीय प्रमुख गन्तव्यको रुपमा रहेको पोखराका होटेल व्यवसाय आन्तरिक पर्यटकलाई लक्षित गरी खुल्ने पोखरा होटेल व्यवसायी संघले जनाएको छ ।

कोरोनाको महामारी अझै समाप्त नभइसकेको र हवाई उडानहरुपनि सञ्चालनमा नआईसकेकाले आन्तरिक पर्यटकहरुलाई लक्षित गर्नुको विकल्प नभएको होटेल व्यवसायीहरुले बताएका छन् ।