काठमाडौं –खेलाडीको रुपमा अन्तर्राष्ट्रिय क्रिकेटबाट मंगलबार सन्यासको घोषणा गरेका नेपाली राष्ट्रिय क्रिकेट टोलीका पूर्वकप्तान पारस खड्काले नेपाल क्रिकेट संघ (क्यान)को व्यवस्थापनमा आउने इच्छा व्यक्त गर्नुभएको छ । आज पत्रकार सम्मेलन गर्दै उहाँले अब आफू क्यानमा रहेर क्रिकेट विकासमा लाग्ने बताउनुभएको छ ।

‘क्यानमा कुनै न कुनै भूमिकामा आउन सकिन्छ । पदाधिकारी हुँला, कोषाध्यक्ष, अध्यक्ष हुँला’, उहाँले भन्नुभयो, ‘तर, सरोकारवालाहरूले पनि उत्तिकै जिम्मेवारी लिनुपर्छ । व्यवस्थापनमा रहेर रणनीति राम्रो बनाउन सकियो भने नेपाली टिमलाई उत्कृष्ट बनाउन सकिन्छ ।’

पूर्वकप्तान खड्काले राजनीतिले हरेक क्षेत्रलाई छोएको बताउँदै राम्रो अवसर आएको खण्डमा आफू राजनीतिमा पनि आउनसक्ने संकेतसमेत गर्नुभयो ।

‘राजनीति पनि राम्रो र नराम्रो हुन्छ, हामीले राम्रोलाई सहयोग गर्नुपर्छ,’ उहाँले भन्नुभयो, ‘क्रिकेटमा टिले जित्नुपर्छ, टीम स्प्रिट कायम रहिरहनुपर्छ, खेलाडी जो आए पनि फरक पर्दैन ।’