काठमाडौं– युरोकप फुटबलको सेमिफाइनल समीकरण पूरा भएको छ । गएराति युक्रेन र इंग्ल्याण्डबीचको खेल सकिएसँगै अन्तिम चारमा पुग्ने टोलीको टुंगो लागेको हो।

युक्रेनलाई ४–० गोल अन्तरले पराजित गर्दै इंग्ल्यान्ड युरोकपको सेमिफाइनलमा पुग्ने अन्तिम टिम बनेको छ । त्यसअघि अघिल्लो क्वार्टरफाइनलको खेलमा डेनमार्कले चेक रिपब्लिकलाई २—१ ले पराजित गर्दै सेमिफाइनल प्रवेश गरेको थियो ।

यसपटक इंग्ल्याण्ड, इटाली, स्पेन र डेनमार्कले अन्तिम चारमा स्थान बनाएका छन् । सेमिफाइनल खेल बुधबार र बिहीबार इंग्ल्यान्डको लण्डनस्थित वेम्बली स्टेडियममा हुनेछन् ।

पहिलो सेमिफाइनलमा इटाली र स्पेन भिड्ने छन् भने दोस्रो सेमिफाइनलमा डेनमार्क र इंग्ल्यान्डबीच प्रतिस्पर्धा हुनेछ ।
फाइनल भने जुन ११ तारिखमा हुनेछ ।

यस्तो छ खेल तालिका :

बुधबार राति १२ः४५ बजे – इटालीविरुद्ध स्पेन

बिहीबार राति १२ः४५ बजे – डेनमार्कविरुद्ध इंग्ल्याण्ड ।

कोपा अमेरिकामा अन्तिम चार टोलीको पनि टुंगो लाग्यो

ब्राजिलमा जारी कोपा अमेरिका २०२१ अन्तर्गत क्वार्टरफाइनल चरणका सम्पूर्ण खेल सकिएका छन् ।

कुल १० राष्ट्र सम्मिलित यस संस्करणको कोपा अमेरिकामा अब मात्र चार राष्ट्र बाँकी रहेका छन् ।

पहिलो सेमिफाइनल खेलमा साविक विजेता ब्राजिलले गत संस्करणको उप–विजेता पेरूसँग प्रतिस्पर्धा गर्नेछ ।

त्यस्तै अर्को खेलमा लियोनल मेसीको कप्तानीमा रहेको अर्जेन्टिना कोलम्बियासँग आमने सामने हुने तालिका रहेको छ ।

सेमिफाइनल तालिका यस्तो छ :

जुलाई ६, २०२१

१) ब्राजिलविरुद्ध पेरू
नेपाली समयः बिहान ४ः४५
स्थान : निल्टन सान्टोस स्टेडियम, रियो डे जिनेरो, ब्राजिल

 

जुलाई ७, २०२१

२) अर्जेन्टिनाविरुद्ध कोलम्बिया
नेपाली समय : बिहान ६ः४५
स्थान : नेशनल स्टेडियम, ब्राजिलिया, ब्राजिल ।