एजेन्सी – युरोपेली च्याम्पियनसिप (युरो कप) फुटबलअन्तर्गत समूह ई को खेलमा स्पेन स्विडेनसँग गोलरहित बराबरीमा रोकिएको छ । यससँगै स्पेनले तुलनात्मक कमजोर मानिएको स्विेडनसँग घरेलु मैदानमा अंक बाड्न बाध्य भएको छ ।

खेलको ३९ औं मिनेटमा अल्भारो मोराटाले स्पेनलाई अग्रता दिलाउने सुवर्ण अवसर गुमाएका थिए । कप्तान जोर्डी अल्बाले दिएको चिप पासलाई स्विडेनका ड्यानिएल्सनले क्लियर गर्न नसक्दा पेनाल्टी क्षेत्र भित्र वन भर्सेस वनको स्थितिमा मोराटा गोल गर्नबाट चुकेका थिए ।

यसपछि पनि स्पेनका खेलाडीहरुले बल पोसेसनमा पकड जमाउँदै धेरै आक्रमणका प्रयास गरेका थिए । तर, सफल हुन सकेनन् ।

यस बराबरीसँगै स्पेन र स्विडेनले पहिलो खेलमा अंक बाँडेका छन् ।

त्यसअघि समूह ई कै पहिलो खेलमा स्लोभाकियाले पोल्यान्डमाथि जित दर्ता गरेको थियो । १० खेलाडीमा सिमित पोल्यान्डलाई स्लोभाकियाले २–१ ले स्तब्ध पारेको थियो ।

त्यस्तै, जर्मन क्लब बायर लिभरकुसनका फरवार्ड प्याट्रिक सिकको दुई गोल मद्दतमा चेक रिपब्लिकले स्कटल्यान्डमाथि सनसनीपुर्ण जित हात पारेको छ । सोमबार साँझ भएको खेलमा चेक रिपब्लिकले घरेलु टोली स्कटल्यान्डमाथि २–० को जित निकालेको हो । प्रतिस्पर्धात्मक र रोमाञ्चक

खेलमा दुवै टोलीले खेलको सुरुवातदेखि नै आक्रमक फुटबल खेलेका थिए ।

चेक रिपब्लिकले ११ वर्षपछि स्कटल्यान्डलाई हराएको हो ।

यो जितसँगै समूह ‘डी’ मा चेक रिपब्लिक ३ अंक जोडेर शीर्षस्थानमा उक्लिएको छ । समान ३ अंक भएपनि गोल अन्तरमा इंग्ल्यान्ड दोस्रो स्थानमा छ । क्रोएसिया तेस्रो तथा स्कटल्यान्ड पुछारमा छ ।