जनकपुरधाम । धनुषामा रकम लुटिएको नाटक गरेर आपसमा बाँड्ने सहमति गरेका तीनजनालाई प्रहरीले पक्राउ गरेको छ । पक्राउ पर्नेमा धनुषाको कमला नगरपालिका २ का २० वर्षीय धिरजकुमार अधिकारी, शहीदनगर नगरपालिका–७ का २१ वर्षीय सुजित मण्डल र जनकपुर उपमहानगरपालिका–१६ का २१ वर्षीय छोटु झा छन् ।

पक्राउ परेकामध्ये अधिकारी यदुकोहास्थित मोटरसाइकल शोरुमका कर्मचारी हुन् । प्रहरीका अनुसार अधिकारीले शोरुमले बैङ्कमा जम्मा गर्न पठाएको रकम मण्डल र झासँगको आपसी सहमतिमा लुटपाट भएको नाटक गरेर भागबण्डा गर्ने योजना बनाएको खुलेको धनुषाका प्रहरी प्रवक्ता रामेश्वर कार्कीले बताउनुभयो ।

अनुसन्धान गर्दा तीनै जनाले आपसी सहमतिमा लुटपाटको नाटक गरेका खुलेको उहाँले बताउनुभयो ।