काठमाडौँ – कोरोना भाइरसबाट संक्रमित पूर्व राजा ज्ञानेन्द्र शाह र पूर्व रानी कोमलराज्यलक्ष्मी शाह अस्पताल भर्ना हुनुभएको छ ।

डाक्टरको सल्लाहमा उनीहरु नर्भिक अस्पताल भर्ना भएका हुन् ।

शनिबार दिउँसो १ बजे उनीहरु भर्ना भएका नर्भिक अस्पतालले जनाएको छ ।

यस्तै पूर्व राजाकी छोरी पूर्व अधिराजकुमारी प्रेरणा राज्यलक्ष्मी सिंहलाई पनि कोरोना संक्रमण भएको छ ।

उनलाई पनि शनिबार नै पूर्व राजा रानी ज्ञानेन्द्र र कोमलसँगै नर्भिक अस्पतालमै लगिएको छ । पूर्व राजा ज्ञानेन्द्र हालै हरिद्वारमा आयोजित कुम्भ भेलामा सहभागी भएका थिए ।

कुम्भ भेलामा सहभागी लाखौँमा कोरोना संक्रमण भएको भारतीय मिडियाले जनाएका छन् । भारतबाट फर्के लगत्तै पूर्व राजा रानीमा संक्रमण पुष्टि भएको थियो ।

छोरीमा पनि बुबा आमाबाटै संक्रमण सरेको अनुमान गरिएको छ। नर्भिकमा भर्ना भएका तीनै जनाको स्वास्थ्य अवस्था स्थिर रहेको अस्पतालले प्रेस नोट जारी गरेर जानकारी दिएको छ।